د شهیدانو درنې ورثې او معلولیت لرونکو وګړو!
ایا تاسو پوهیږئ چې د بریښنایی تذکرې درلودل تاسو سره مرسته کوي؛ څو روڼتيا را منځته شي او تاسو خپل معاش په ټاکلي وخت ترلاسه کړئ؟
ایا تاسو پوهيږئ چې ستاسو د ۱۴۰۰ ه لمريز کال معاش به د بریښنايي تذکرو پرته تادیه نه شي؟
د بریښنایي تذکرو ترلاسه کولو سره، تاسو کولی شئ له یوې خوا د ښې حکومتوالۍ په پیاوړتیا کې برخه واخلئ او له بلې خوا د روڼتيا په رامنځته کيدو او فساد له منځه وړلو کې بنسټيز او رغنده رول ولوبوئ.
د شهیدانو او معلولینو چارو وزارت ژمن دی، چې خپلو مراجعينو لپاره غوره خدمتونه وړاندې کړي او ستاسو ستونزو ته پر وخت رسيدنه وکړي.
د وزارت مشرتابه پریکړه کړې، چې په ۱۴۰۰ هجري لمریز کال کې د معاشونو او خدماتو په تادیه کې بشپړه روڼتيا او اسانتیا را منځته کړي.
پدې برخه کې، د شهیدانو او معلولینو چارو وزارت په پام کې لري، چې د بریښنایي سیسټم پلي کولو پر بنسټ د فساد ، درغليو او ناقانونه فعالیتونو مخه ونیسي. څو پر مټ يې مستحق وګړي په روښانه او شفافه بڼه خپل حقوق ترلاسه کړي.
د شهیدانو هغه ورثې او معلولیت لرونکي وکړي چې بریښنایي تذکرې لري، کولی شي په کم وخت کې په ګړندي، اسانه او رڼه توګه د وزارت د بریښنایي سیسټم له لارې خپل معاشونه ترلاسه کړي.
هغه کسان چې تر دې دمه يې بریښنایي تذکرې نه دي اخيستې، مهرباني دې وکړي، د شهیدانو او معلولینو چارو وزارت ته د تشریف راوړي او په ولایتونو کې دې هم نږدې بریښنایي تذکرو ویش مرکزونو ته مراجعه وکړي او ژر تر ژره دې برېښنايي تذکرې تر لاسه کړي.
که غواړئ د خپلو حقونو او امتیازاتو په اړه نور معلومات ترلاسه کړئ، نو مهرباني وکړئ له موږ سره په 717 شمېره اړیکه ونیسئ.
