د شهیدانو او معلولینو چارو وزارت د یتیمانو، کونډو او معلولیت لرونکو وګړو لپاره د اقتصادي ځان بسیاینې په موخه د څه باندې یو دیرش (۳۱) میلیونه افغانيو په ارزښت د (HHRD) مؤسسې سره هوکړه لیک لاسلیک کړ
یاد هوکړه لیک د شهیدانو او معلولینو چارو وزارت د بهرنيو اړیکو او پلان رئیس محترم ملا صدوخان حق شناس او د (HHRD) مؤسسې د استازي محترم همایون نوري ترمنځ لاسلیک شو، د هغه پر اساس به، په کابل، لغمان، ننګرهار، زابل، غزني او کنړ ولایتونو کې (۱۱۱۲) تنو د شهیدانو ورثه وو او معلولیت لرونکو وګړو لپاره د بدیل معیشت او خوراکي خوندیتوب پروګرام تطبیق شي.
په یاد پروګرام کې د شهیدانو ورثه وو او معلولینو لپاره د فني او حرفوي زده کړو برابرول، د هغوی د کورنيو لپاره د خوراکي خوندیتوب رامنځته کول او د اقتصادي ځان بسیاینې په لور د هغوی د کورنيو سوق کول شامل دي.
د یادونې وړ ده چې د دې پروژې ټولیز ارزښت (۳۱) میلیونه او (۶۲۰) زره افغانۍ کېږي او د یوه کال په موده کې به، په منظم ډول په پورته ذکر شويو ولایتونو کې تطبیق کړل شي.
