د شهیدانو او معلولینو چارو وزارت د شپږو (۶) بستونو لپاره ازموینه واخیسته
د شهیدانو او معلولینو چارو وزارت د بشري سرچینو ریاست په دې وزارت کې د شپږو (۶) خالي بستونو لپاره ازموینه واخیستله، په دې ازموینه کې پنځه پنځوس (۵۵) تنو وړ کسانو د ازادې سیالۍ له لارې ګډون وکړ.
له ګډونوالو څخه د ازموینې اخیستو په پروګرام کې د بشري سرچینو رئيس ښاغلي مولوي محمد موسى صديقي، د وزارت د دفتر رئيس ښاغلي قاري شاه محمد دوست، د دعوت او ارشاد رئيس ښاغلي مفتي عبدالاحد مسعود، د ټولنيزو خدمتونو تنظیم رئيس ښاغلي مولوي ثناء الله فرقاني، د نوموړي وزارت د اداري او خدماتو رئیس ښاغلي ملا عبدالرحمن فهیم او د وزارت ځینو کارکوونکو حضور درلود.
د دې پروګرام په ترڅ کې د شهیدانو او معلولینو چارو وزارت د دعوت او ارشاد رئیس ښاغلي مفتي عبدالاحد مسعود د دې ازموینې په تړاو چې د آزادې سیالۍ په بڼه ترسره شوه، پر ارزښت خبرې وکړې، زیاته يې کړه: تقوا، اخلاص، دیني او معاصره پوهه هغه موارد دي چې په دې آزموینه کې به په پام کې ونیول شي.
نوموړي همداراز د شهیدانو او معلولینو چارو وزارت د بشري سرچینو له ریاست څخه د مننې تر څنګ ټینګار وکړ، چې کار باید اهل کار ته وسپارل شي.
همدارنګه د دې ازموینې په ترڅ کې د شهیدانو او معلولینو چارو وزارت د بشري سرچینو ریاست د استخدام آمر ښاغلي محمد انور سخیزاده د ازموینې د اخیستو د څرنګوالي په اړه هراړخیز معلومات وړاندې کړل او ډاډ یې ورکړ چې دا ازموینه به په شفاف ډول ترسره شي او د ازموینو د پاڼو په څیړنه کې به له پوره دقت څخه کار واخیستل شي.
د يادونې وړ ده، چې د دې ازموينې ګډونوالو له دې وړاندې دغه وزارت ته خپل غوښتنلیکونه سپارلي وو.
