د شهیدانو او معلولینو چارو وزارت باصلاحیته پلاوي فاریاب ولایت ته د سفر په ترڅ کې د نوموړي ولایت د خواجه سبز پوش او شیرین تګاب ولسوالیو څخه لیدنه وکړه او ځینو یتیمانو او معلولینو سره یې له نږدې وکتل
د شهیدانو او معلولینو چارو وزارت مرستیال ښاغلی شیخ صاحب عبدالحکیم حقاني چې د یو با صلاحیته پلاوي مشرۍ کوي د خپل سفر په ترڅ کې د فاریاب ولایت د شهیدانو او معلولینو چارو ریاست فعالیتونه او کړنې په هر اړخیزه توګه وارزولې او د لا زیاتو څیړنو په موخه یې د یاد ولایت د خواجه سبز پوش او شیرین تګاب ولسوالېو ته هم سفرونه وکړل.
د نوموړي پلاوي د سفر اصلي موخه یتیمانو، معلولینو او کونډو ته د خدمتونو وړاندې څرنګوالي په اړه څېړنه او ارزونه بلل شوې ده، څو یادو کسانو ته د خدمتونو وړاندې کولو څرنګوالې له نږدې وڅیړي او پر وړاندې یې پرتې ستونزې او ننګونې له منځه یوسي.
د یاد سفر په ترڅ کې د شهیدانو او معلولینو چارو وزارت مرستیال شیخ صاحب عبدالحکیم حقاني د خبرو په ترڅ کې وویل: په اسلامي امارت کې د جعلکارۍ هیڅ ځای نشته او هیچا ته به اجازه هم ورنکړل شي چې د چا حق ضایع کړي. نوموړي همدا راز معلولیت لرونکو وګړو او یتیمانو ته ډاډ ورکړ، چې د شهیدانو او معلولینو چارو وزارت تل معلولیت لرونکو وګړو او یتیمانو ته د شفافو او رڼو خدمتونو په وړاندې کولو کې ژمن دی.
همدارنګه د یاد پلاوي لخوا د فاریاب ولایت د خواجه سبز پوش او شیرین تګاب په ولسوالېو کې پر یو شمېر مستحقو کسانو نغدي مرستې هم وویشل شوې.
د یاونې وړ ده چې د یاد پلاوي ترکیب کې د شهیدانو او معلولینو چارو وزارت د دفتر رئیس ښاغلی قاري شاه محمد دوست، د داخلي تفتيش رئيس ښاغلی مولوي احسان الله حقاني، د معلولینو چارو رئیس ښاغلی مولوي عبدالنافع منتفع او د پلانونو د تطبیق او ارزونې آمر ښاغلی قاري سید اسحاق شامل دي
