د شهیدانو او معلولینو چارو وزارت اړوند د شهید تر عنوان لاندې مجله چاپ شوه
د شهیدانو او معلولینو چارو وزارت اړوند " د شهید مجلې" تر عنوان لاندې درېیمه ګڼه مجله چاپ شوه. یاده مجله د دې وزارت د اطلاعاتو او عامه اړیکو ریاست له لوري ترتیب او ډیزاین شوې وه، چې په مجموع کې پنځه سوه (۵۰۰) ټوکه چاپ شوې ده.
په دې مجله کې بېلابېل مطالب خپاره شوي چې په کې مقالې، راپورونه، مرکې او د شهیدانو او معلولینو چارو وزارت مهمې لاسته راوړنې شاملې دي. دا مطالب د دې وزارت د هغو فعالیتونو ښکارندويي کوي چې د شهیدانو وارثینو او د معلولیت لرونکو کسانو د ملاتړ او خدمتونو د وړاندې کولو په موخه یې په مرکز او ولایتونو کې ترسره کړي دي.
همداراز په دې مجله کې دیني، اسلامي او ټولنیزې مقالې هم خپرې شوې دي چې موخه یې د عامه پوهاوي لوړول، د معنوي ارزښتونو پیاوړتیا او د یتیمانو، کونډو او د معلولیت لرونکو وګړو د ملاتړ لپاره هڅې دي.
