د شهیدانو او معلولینو چارو وزارت او د (ZFA) خیریه مؤسسې ترمنځ د یتیمانو، کونډو او معلولیت لرونکو وګړو د ملاتړ په موخه د همکارۍ هوکړه لیک لاسلیک شو
د همکارۍ دا هوکړه لیک د دې وزارت د بهرنېو اړیکو او پلان رئیس محترم ملا صدو خان حق شناس او د (ZFA) خیریه مؤسسې رئیس محترم ډاکټر حمیدالدین یولداش ترمنځ لاسلیک شو چې له مخې به یې په کابل، کندهار، هلمند، بغلان، تخار او بدخشان ولایتونو کې دوه زره (۲۰۰۰) تنو مستحقو یتیمانو، کونډو او معلولینو ته د روژې په مبارکه میاشت کې پنځه (۵) ډوله خوراکي مواد چمتو او ووېشل شي.
د هوکړه لیک د لاسلیک پر مهال محترم ملا صدو خان حق شناس د یادې خیریه مؤسسې له رئیس څخه یتیمانو، کونډو او معلولینو ته د مرستو چمتو کولو په پار مننه وکړه او له هغه یې وغوښتل په هغو سیمو کې چې تر اوسه مستحقو کسانو مرستې ترلاسه کړي نه دي د هغوی لپاره هم مرستې چمتو کړي تر څو یتیمان، کونډې او معلولین په مساویانه ډول له مرستو څخه برخمن شي.
د یادونې وړ ده چې د دې پروژې مجموعي لګښت (۱۰۱) زره او (۴۷۰) امریکايي ډالره کېږي او د یادو ولایتونو د شهیدانو او معلولینو چارو ریاستونو په همغږۍ به تطبیق شي.
