د شهیدانو او معلولینو چارو وزارت او د اقتصادي، ټولنیز او ظرفیت لوړولو (ODESC) مؤسسې ترمنځ هوکړه لیک لاسلیک شو

د شهیدانو او معلولینو چارو وزارت په نورستان ولایت کې د یتیمانو، معلولینو او نورو زیانمن شویو ځوانانو ته د مسلکي مهارتونو د زده کړې په موخه، د (ODESC) مؤسسې سره (۴) لکه، (۳۶) زره او (۲۷۸) ډالرو په ارزښت د همکارۍ هوکړه لیک لاسلیک کړ.

د لاسلیک شوي هوکړه‌لیک پر بنسټ به د شهیدانو، معلولینو له کورنیو او زیانمن شویو ځوانانو څخه (۱۲۵۰) تنو ته د حرفوي مهارتونو روزنه ورکړل شي. دغه روزنې به د خیاطۍ، د خوراکي توکو د پروسس، د لبنیاتو د تولید، د موبایل ترمیم او نورو اړوندو برخو کې ترسره شي، څو ګډونوال عملي مهارتونه ترلاسه کړي او د کار بازار ته چمتو شي.

د حرفوي زده کړو له بشپړېدو وروسته به ګډونوالو ته د کسب او کار د پیل لپاره اړوند وسایل او تجهیزات ورکړل شي، سربېره پر دې، د هغو زیانمن شویو ځوانانو او لویانو لپاره چې له زده کړو محروم پاتې دي، د سواد زده کړې پروګرامونه به هم پلي شي، څو په ټولنه کې فعاله ونډه واخلي.

د همکارۍ دغه هوکړه لیک د دې وزارت د بهرنیو اړیکو، پلان او تقنین چارو رئيس محترم مولوي ثناء الله فرقاني او د (ODESC)  خیریه مؤسسې رئیس محترم حسیب الله رحیمي تر منځ لاسلیک شو، چې د نورستان ولایت د شهیدانو او معلولینو چارو ریاست سره په همغږۍ به د لسو میاشتو په موده کې تطبیق شي.