د شهیدانو او معلولینو چارو وزارت، د ارشاد، حج او اوقافو وزارت او له مسلم هنډز نړیوالې موسسې سره د همکارۍ هوکړه لیکونه لاسلیک کړل
د شهیدانو او معلولینو چارو وزارت د برنامو او همغږۍ مرستیالې اغلې صبرۍ اندړ، د ارشاد، حج او اوقاف ورازت مسلکي مرستیال امین الدین مظفري او د مسلم هنډز موسسې مشر فضل احمد خان رڼاخېل سره د همکارۍ هوکړه لیکونه لاسلیک کړل.
اغلې اندړ په دې غونډه کې چې د حکومت د رسنیو په مرکز کې جوړه شوې وه، وویل: د شهیدانو او معلولینو چارو وزارت او ځینې ملي او نړیوالو بنسټونو لخوا د شهیدانو او معلولیت لرونکو وګړو ته د خدمتونو او اسانتیاوو د برابرولو په برخه کې یو اړین ګام اخیستل کېږي او د دې هوکړه لیکونو لاسلیک به د یادو کسانو ستونزې تر ډېره حل کړي.
اغلې اندړ زیاته کړه: "دا هوکړه لیکونه د معلولیت لرونکو وګړو حقونو او امتیازونو په اړه د عامه پوهاوي د کچې لوړول، په ټولنه کې د شهیدانو د وارثینو او معلولینو د ژوند غوره فرصتونو ته لاسرسی، د شهیدانو او معلولیت لرونکو وګړو د میراثي حقونو د ساتنې او په جوماتونو او ممبرونو کې د شهیدانو کورنیو ته د یوه ځانګړي میکانیزم له لارې خدمتونه او عامه پوهاوی ترسره کیږي."
اغلې اندړ وویل: "همدارنګه د شهیدانو وارثینو او معلولیت لرونکو وګړو لپاره د عمل پلانونو ډیزاین او پلي کول، د همغږۍ او همکارۍ پیاوړي کولو لپاره د بین الوزارتي همغږۍ میکانیزم رامینځته کول او دوی ته د خدمتونو چمتو کولو پروسه کې د معلوماتو د تبادلې سیسټم رامینځته کول، د دې تړون نورې موخې دي."
د شهیدانو او معلولینو چارو وزارت د برنامو او همغږۍ مرستیالې صبرۍ اندړ وویل د شهیدانو او معلولینو چارو وزارت، د شهیدانو وارثینو او معلولیت لرونکو وګړو ته د خدمتونو وړاندې کولو پروسې کې د مخکښ، همغږۍ او نظارت کوونکي ارګان په توګه، هر اړخیز کار کوي او په همدې موخه مو نن یاد هوکړه لیکونه لاسلیک کړل تر څو د شهیدانو وارثینو او معلولیت لرونکو وګړو د ژوند د کچې په لوړولو کې مو یو اړین ګام پورته کړی وي.
په پای کې اغلې اندړ له دواړو ادارو (د ارشاد، حج او اوقاف وزارت او مسلم هندز نړیوالې موسسې) څخه مننه او کورودانی وکړ چې د لاسلیک په غونډه کې یې ګډون وکړ.
