د شهیدانو او معلولینو چارو سرپرست وزیر د معلولیت لرونکو ښځو له استازو سره وکتل
د شهیدانو او معلولینو چارو سرپرست وزیر د معلولیت لرونکو ښځو له استازو سره وکتل
د شهیدانو او معلولینو چارو سرپرست وزیر پوهنمل حمیدالله فاروقي نن سه شنبه د وري په ۱۷مه، د معلولیت لرونکو ښځو د بنیاد رئیسې زربیګم سروري سره وکتل او د معلوليت لرونکو ميرمنو اړوند مسايلو باندې يې ورسره خبرې وکړې.
په پيل کې اغلې سروري په وزارت کې د پوهنمل حميدالله فاروقي د وروستيو اصلاحاتو او چارو برېښنايي کولو په تړاو د هڅو ستاینه وکړه وويل: د معلولیت لرونکو ښځو او په جګړو کې د شهيد شويو سرتېرو ميرمنې د هېواد په کچه تر ټولو بې وزله او محرومې ميرمنې دي، کومې چې په لوړ همت او شهامت د خپلو کورنيو سرپرستي کوي.
ددې په خبره، چې د سولې په پروسه کې معلوليت لرونکې میرمنې بنسټيز رول لوبولی شي او په دې برخه کې هغوی ته بايد د ګډون اسانتياوې برابرې شي.
اغلې سروري څرګنده کړه، چې معلولیت لرونکې میرمنې تل د ټولنیز عدالت د ټينګښت او د نظام د پايښت لپاره د خپلو معلولینو وروڼو تر څنګ مبارزه کوي. دولت مسووليت لري چې معلوليت لرونکو ميرمنو د لاسي صنایعو، کارموندنې، حقونو د ورکړې، سرپناه، زده کړو او د ژوند په نورو برخو کې ددې قشر لازم لاسنيوی وکړي.
پوهنمل حمیدالله فاروقي د خبرو په ترڅ کې د افغانستان د تاریخ په مختلفو دورو کې د ښځو، په ځانګړې توګه د معلولیت لرونکو میرمنو د اتلواليو او سرښندنو ستاينه وکړه وويل: معلوليت لرونکو ميرمنو ستونزو ته رسيدنه او د حقونو ورکړه زموږ له کاري لومړیتوبونو څخه دي او د هغوی مبارزه او زړورتیا به راتلونکو نسلونو ته لوی درس او وياړونه په میراث پرېږدي.
ښاغلي فاروقي زیاته کړه، چې له دولت سره د مدني ټولنو او بنسټونو همغږي په ادارو کې تحرک او نظم راولي او د همدې اړيکو پر بنسټ د ستونزو د هواري فرصتونه رامنځته کېږي.
ښاغلي فاروقي څرګنده کړه، چې د معلوليت لرونکو ميرمنو د ټولو قانوني او رواوو غوښتنو لپاره د رسيدنې او پاملرنې په موخه اړين او لازم اجراات دوام لري.
په پای کې د معلوليت لرونکو ميرمنو استازو، ياد قشر ته د ځانګړې پاملرنې له امله ښاغلي فاروقي ته ستاينليک او د وياړ چپنه ډالۍ کړل.
