د شهیدانو او معلولینو چارو محترم وزیر الحاج ملا عبدالمجید آخند نیمروز ولایت ته سفر وکړ
د شهیدانو او معلولینو چارو وزیر محترم الحاج ملا عبدالمجید آخند چې د دې وزارت د مالي او حسابي چارو رئیس محترم مولوي محمد امین دروېش، د دعوت او ارشاد رئیس محترم مفتي عبدالاحد مسعود او د شهیدانو ورثه وو او معلولینو د ادغام آمر محترم ملا ابراهیم شاه خلیل یې ملتیا کوله، د شهیدانو ورثه وو او معلولینو د وضعیت د ارزونې او د هغوی د کورنیو د احوال اخیستنې په موخه نیمروز ولایت ته سفر وکړ.
محترم وزیر صاحب د نیمروز ولایت د شهیدانو او معلولینو چارو ریاست د کاري بهیر څخه د لیدنې ترڅنګ، د مجردو شهیدانو ورثه وو سره له نږدې وکتل، د هغوی احوال یې واخیست، خپله خواخوږي او همدردي یې ورسره څرګنده کړه، غوښتنې یې واوریدې او ورسره یې یو اندازه نغدي مرسته ترسره کړه.
همداراز د شهیدانو او معلولینو چارو وزیر محترم الحاج ملا عبدالمجید آخند د نیمروز ولایت له والي محترم مولوي عبدالمنان محمود سره وکتل، په دې لیدنه کې د شهیدانو او معلولینو چارو محترم وزیر ډاډ ورکړ چې وزارت د ځانګړې شوې بودجې د ترلاسه کولو سره به په ټول هېواد کې د یتیمانو، کونډو او معلولیت لرونکو وګړو د میاشتني نغدي مساعدتونو د وېش پروسه پیل شي، په ورته وخت کې د نیمروز ولایت والي هم د یتیمانو او معلولینو د کورنیو د ستونزو د حل په برخه کې د هر اړخیزې همکارۍ ژمنه وکړه.
د دعوت او ارشاد رئیس محترم مفتي عبدالاحد مسعود وویل چې نیمروز ولایت ته د شهیدانو او معلولینو چارو محترم وزیر د سفر اصلي موخه، د عالیقدر امیرالمؤمنین حفظه الله تعالی له لوري د مجردو شهیدانو کورنیو ته ځانګړې شوې مرستې رسول او د هغوی احوال اخیستل وو. نوموړي همدارنګه ډاډ ورکړ چې په راتلونکي کې به هم د یادو کورنیو سره ورته مرستې دوام ومومي.
