محترم شیخ عبدالحکیم حقاني د ننګرهار ولایت په شېرزاد او خوګیاڼو ولسوالیو کې د شهیدانو له کورنیو سره نغدي مرسته وکړه
د شهیدانو او معلولینو چارو وزارت مرستيال محترم شیخ صاحب عبدالحکیم حقاني چې د خوست ولایت د اطلاعاتو او فرهنګ رئيس یې ملتیا کوله، ننګرهار ولایت ته یې د سفر په ترڅ کې د یو شمېر شهیدانو له کورنیو سره یې د شېرزاد او خوګياڼو ولسواليو په ګندمک، میمله او نورو سیمو کې له نږدې وليدل، د شهيدانو پاک روح ته یې دعا وکړه، د هغوی کورنیو سره یې د خواخوږۍ او همدردي ترڅنګ، یوه اندازه نغدي مرسته هم ترسره کړه.
محترم شیخ صاحب همداراز د نومیالیو جهادي شخصیتونو د کورنیو احوال هم له نږدې واخیست، په ځانګړي ډول د ملک جیفور (تقبلهالله)، مولوي صاحب غریب الله، مولوي صاحب محمد اسماعیل، مولوي صاحب حضرت محمد مسافر او مولوي صاحب خان محمد (تقبلهم الله) کورنیو ته یې د تسلیت او ډاډګېرنې مراتب وړاندې کړل، او ورسره یې یوه اندازه نغدي مرسته هم ترسره کړه.
د یادونې وړ ده چې د شهیدانو او معلولینو چارو وزارت مرستیال محترم شیخ عبدالحکیم حقاني تر دې وړاندې د ننګرهار ولایت چپرهار ولسوالۍ ته هم سفر کړی و، هلته یې د شهیدانو له کورنیو او معلولینو سره له نږدې لیدنه کړې وه، د هغوی حال یې پوښتلی و او هغوی باندې یې ورته نغدي مرستې هم وېشلې وې.
