د شهیدانو او معلولینو چارو وزارت د دفتر رئیس په بغلان ولایت کې د شهيدانو کورنيو سره نغدي مرسته ترسره کړه
د شهیدانو او معلولینو چارو وزارت د دفتر رئيس محترم مولوي شاه محمد دوست د بغلان ولايت اړوند په دوشي، خنجان، پلخمري او ډنډ غوري ولسوالېو کې د شهيدانو کورنيو سره یې له نږدې ولیدل، د شهيدانو پاک روح ته یې دعا وکړه، کورنيو ته یې د ډاډګېرنې او خواخوږۍ مراتب وړاندې کړل، په دقت سره یې د هغوی ستونزې او غوښتنې واورېدې او هرې کورنې سره یې یو اندازه نغدي مرسته هم ترسره کړه.
محترم الحاج مولوي شاه محمد دوست د شهيدانو له کورنيو سره په ليدنه کې وويل: تاسو په هېواد کې د اسلامي نظام د حاکمیت لپاره لويه قرباني ورکړې ده، اوس له تاسو غواړو چې د اسلامي نظام د مشرانو لپاره دعاوې وکړئ تر څو د دې نظام په پياوړتيا سره د تللو شهيدانو او د افغان مجاهد ولس ارمانونه پوره شي.
هغه همدارنګه یادو کورنیو ته یې ډاډ ورکړ چې د اسلامي امارت مشرانو هېڅکله هغوی هېر کړي نه دي او د شهیدانو او معلولینو کورنیو ته یې د غوره خدمتونو وړاندې کولو په موخه د شهیدانو او معلولینو چارو وزارت جوړ کړی دی.
د نوموړي په وينا د اسلامي امارت مشران، په ځانګړې توګه د عاليقدر امیرالمؤمنین حفظه الله تعالی تل دا توصیه وي چې وخت پر وخت د شهیدانو کورنېو پوښتنه وشي او هغوی سره لازمه همکاري ترسره شي.
