په زابل ولايت کې د فني او حرفوي زده کړو څخه (۹۸) تنه زده کوونکي فارغ شول
د زابل ولايت د شهيدانو او معلولينو چارو رياست تر څارنې لاندې د HHRD مؤسسې له لوري شپږ میاشتې وړاندې (۹۸) تنو په شرایط برابر کسانو ته چې (۳۴) تنه یې یتیمان او معلولین وو، د خیاطۍ او موبايل ترمیم په برخو کې او همداراز (۶۴) تنو کونډو ته د هغوی د اقتصادي ځان بساینې په موخه د چرګانو پالنې په برخه کې زده کړې ورکړل شوې.
په هغه پروګرام کې چې په همدې موخه د زابل ولایت د شهیدانو او معلولینو په ریاست کې جوړ شوی وو، د یاد ولایت د شهیدانو او معلولینو چارو رئیس محترم ملا عبدالحکیم دانش، د اقتصاد رئیس محترم مولوي عزت الله او د (HHRD) مؤسسې رئیس محترم عبیدالله فیصل او يو شمېر نورو کارکوونکو برخه اخيستې وه.
محترم ملا عبدالحکيم دانش د یادې مؤسسې له مسؤلینو څخه د مننې ترڅنګ، هيله څرګنده کړه، چې نورو مستحقو کسانو ته هم ورته پروګرامونه په لاره واچول شي تر څو هغوی له اقتصادي پلوه په ځان بسيا شي.
د يادونې وړ ده، چې فارغو شويو کسانو ته د خپلو اړوندو مسلکونو وسايل او ابزار هم ووېشل شول.
