د معلولینو د بیا ځواکمنتيا په ریاست کې د یتیمانو او معلولینو د صحي ملاتړ پروګرام د یوې غونډې په ترڅ کې پیل شو
په هغه پروګرام کې چې په همدې موخه د معلولینو د بیا ځواکمنتيا په ریاست کې جوړ شوی وو، په هغه کې د یاد ریاست رئيس محترم مولوي عبدالنافع منتفع، د اطلاعاتو او عامه اړيکو رئيس محترم مفتي فيصل خاموش، د (HHRD) خیریه مؤسسې همغږي کوونکی محترم انجينر شاکر الله امین، د معلولینو د حسي او حرکي څانګې آمر محترم زاهد الله آفاقی، د ذهني او رواني څانګې آمر محترم علي خان احمدي او د دې رياست اړوندو مسؤلینو حضور درلود.
د یتیمانو او معلولینو د صحي ملاتړ پروګرام د (HHRD) خیریه مؤسسې په مالي ملاتړ په لاره اچول شوی چې یتیمانو او معلولینو ته د صحت په بېلابېلو برخو کې ( ذهني او رواني، فزيوتراپي، مصنوعي غړو جوړونې او همداراز د ستوني، غوږونو او سترګو ناروغېو) د درملنې خدمتونه وړاندې کوي.
د ياد پروګرام په ترڅ کې د اطلاعاتو او عامه اړيکو رئيس محترم مفتي فيصل خاموش په دې وزارت کې د ثبت شویو یتیمانو، کونډو او معلولینو په تړاو خبرې وکړې او زیاته یې کړه: د شهيدانو او معلولینو چارو وزارت په مرکز او ولايتونو کې د ثبت پروسه (۹۵) سلنه پای ته رسولې ده او هغه کسان چې په لرو پرتو سيمو کې ژوند کوي د هغوی د ثبت لړی هم روانه ده.
هغه همداراز زیاته کړه: هغه کسان چې له دې وزارت سره ثبت او راجسټر شوي هغوی ته د یوې شفافې او منظمې پروسې له لارې پرته له هر ډول تبعیض څخه میاشتنۍ نغدي مساعدتونه د بانکي سیسټم له لارې ورکول کیږي.
هغه زیاته کړه: زموږ مسؤليت دا دې چې د اسلامي نظام په چوکاټ کې یتیمانو، کونډو او معلولینو ته خدمتونه وړاندې کړو.
محترم مفتي فيصل همداراز د هغو خيريه بنسټونو او مؤسسو څخه چې د یتیمانو، کونډو او معلولینو سره مرستې او د هغوی لاسنیوی کوي، مننه وکړه.
په ورته وخت کې د(HHRD) خیریه مؤسسې همغږي کوونکي محترم انجينر شاکر الله امین په مرکز او ولايتونو کې د دې مؤسسې د فعاليتونو په هکله هر اړخیز معلومات وړاندې کړل او ویې ویل: یاده مؤسسه د یتیمانو، کونډو او معلولینو سره د خوراکي توکو، د بدیل معیشت، د حرفوي زده کړو پروګرامونو پر لاره اچولو او نغدي مرستو په برخو کې خدمتونه وړاندې کوي.
هغه همداراز د شهیدانو او معلولینو چارو وزارت له رهبرۍ څخه خوښي څرګنده کړه چې د یادې مؤسسې سره یې تل همکارۍ کړې ده.
د یادونې وړ ده چې په ياد مرکز کې به هره ورځ د پنځوسو څخه تر اتیاه تنو د ناروغانو درملنه په وړيا توګه ترسره کیږي.
