د شهیدانو او معلولینو چارو وزارت سره د فان چینا افغان شرکت لخوا بشري مرسته ترسره شوه
د فان چینا افغان سوداګرۍ شرکت لخوا د یو لک او اتیا زره (۱۸۰۰۰۰) امریکايې ډالرو په ارزښت دیرش زره (۳۰۰۰۰) جوړې بوټان د شهیدانو او معلولینو چارو وزارت سره مرسته وشوه.
په هغه پروګرام کې چې په همدې موخه د شهیدانو او معلولینو چارو وزارت کې جوړ شوې وو، په هغې کې د نوموړي وزارت سرپرست وزیر ښاغلي الحاج ملا عبدالمجید آخند، د پلان او همغږۍ رئيس ښاغلي سید محمد عظیم آغا، د دفتر رئيس ښاغلي قاري شاه محمد دوست، د معلولینو چارو رئیس ښاغلي مولوي عبدالنافع منتفع، د ټولنیزو خدمتونو چارو رئیس ښاغلي مولوي ثنأ الله فرقاني، د مالي او حسابي چارو رئیس ښاغلي قاري محمد امین درویش، د اطلاعاتو او عامه اړیکو مسؤل ښاغلي مفتي فیصل خاموش، د فان چینا افغان سوداګرۍ شرکت رئیس ښاغلي داکتر سید حبیب شاپور او د یاد شرکت مرستیال ښاغلي مستر لیو هم ګډون کړی وو.
په یاد پروګرام کې د پلان او همغږۍ رئیس ښاغلي سید محمد عظیم آغا د معلولیت لرونکو وګړو او یتیمانو پر وړاندې د شته ستونزو او ننګونو په هکله خبرې وکړې او د کورنېو او بهرنیو خیریه بنسټونو، سوداګرو او شتمنو کسانو څخه يې وغوښتل تر څو د خپل وس او توان مطابق د دې اړمن قشر( معلولینو، کونډو او یتیمانو) سره مرسته او دهغوی لاسنیوی وکړي.
همدارنګه د یاد پروګرام په ترڅ کې د فان چینا افغان شرکت رئيس ښاغلي ډاکتر سید حبیب شاپور د شویو مرستو د څرنګوالي په هکله معلومات وړاندې کړه او زیاته کړه : یاد شرکت به سربیره پر دې مرستو په نږدې راتلونکي کې د شهیدانو او معلولینو چارو وزارت سره نورې هر اړخیزې مرستې هم وکړي او د اوږدمهاله پروګرامونو په ترڅ کې به د فان چینا افغان شرکت، یتیمانو ته په درې برخو ( بريښنایي فابریکې، د جامو او کاليو ګنډلو فابریکو کې کاري فرصتونه برابر او همدارنګه د یاد شرکت د امکاناتو څخه به یوه برخه د خیریه مرستو په موخه دې وزارت ته ځانګړې کړي.
همدارنګه په یاد پروګرام کې د شهیدانو او معلولینو چارو وزارت د دفتر رئیس ښاغلي قاري شاه محمد دوست د یاد شرکت له مرستو څخه مننه وکړه او زیاته یې کړه: یاد وزارت توانیدلی چې د خیریه بنسټونو په مالي ملاتړ تر دې دمه اتیا زرو (۸۰۰۰۰) اړمنو کسانو ته بیلا بیلې مرستې وویشي.
نوموړي همداراز ډاډ ورکړ چې د یتیمانو، کونډو او معلولینو د تثبیت په پروسه کې هر ډول تبعیض له منځه تللې او یاد وزارت د اسلامي امارت له فتحې وروسته د مرکز په شمول په ټولو ولایتونو کې( ۶۰۰۰۰۰) شپږ لکه معلولین، کونډې او یتیمان ثبت او راجسټر او نوي (۹۰) سلنو ته یې میاشتنۍ نغدي مرستې ویشلې دي.
