د شهيدانو او معلولينو چارو وزارت د برنامو او همغږۍ مرستیالې د UN-habitat مؤسسې له چارواکو سره ليدنه
د شهيدانو او معلولينو چارو وزارت د برنامو او همغږۍ مرستیالې د UN-habitat مؤسسې له چارواکو سره ليدنه
نن سه شنبه د غويي په ۱۴مه، د شهيدانو او معلولينو چارو وزارت د برنامو او همغږۍ مرستیالې او د وزارت سرپرستې صبرۍ اندړ په مشرۍ د UN-habitat مؤسسې له رئيس فرنندو دیکریز او تخنيکي سلاکارې جینفر دونوورن سره مشورتي ناسته ترسره کړه.
د ناستې په پيل کې د UN-habitat مؤسسې تخنيکې سلاکارې په افغانستان کې د خپلو فعاليتونو او لاسته راوړنو په تړاو معلومات وړاندې کړل.
ورپسې د يادې مؤسسې رييس د افغان معلولينو لپاره د بيا پياوړتيا، پر ځان بساينې او هغوی ته د ژوند اسانتياوو برابرولو په برخو کې له وزارت سره د ګډکار او همغږۍ زياتولو غوښتنه وکړه.
آغلې اندړ دوی ته د ښه راغلاست او مننې ترڅنګ د معلولينو په برخه کې د يادې مؤسسې کړنې وستايلې او د دوامداره همکارۍ او ملاتړ هيله يې وکړه.
آغلې اندړ د معلوليت لرونکو وګړو په ظرفيت لوړونې، کارموندنې، روغتيا، فزيکي لاسرسي او هغوی ته د ژوند اسانتياوو برابرولو په برخه کې له يادې مؤسسې سره په ګډو هڅو او کار ټينګار وکړ او د مؤسسې چارواکو ته يې د وزارت له اړخه د هراړخيزو همکاريو او همغږۍ ډاډ ورکړ.
