د معلولیت لرونکو وګړو نړیواله ورځ به په متفاوت ډول ونمانځل شي
د معلولیت لرونکو وګړو نړیواله ورځ به په متفاوت ډول ونمانځل شي
د شهیدانو او معلولینو په چارو کې د دولت وزیر لعل الدین آریوبي د معلولینو په چارو کې د جمهور رییس سلاکار عمرا خان منیب سره وکتل او د معلولیت لرونکو وګړو د نړیوالې ورځې د نمانځنې په څرنګوالي یې خبرې وکړې.
ښاغلي آریوبي د معلولیت لرونکو وګړو د نړیوالې ورځې د نمانځنې په اړه وویل: یاده ورځ باید د تېر کال په پرتله په متفاوته او په داسې بڼه ونمانځل شي، چې د معلولیت لرونکو وګړو په ژوند کې د مثبت بدلون راوستو اغېز یې محسوس وي. ښاغلي آریوبي زیاته کړه، چې د دې ورځې له نمانځنې باید د یوه مهم فرصت په توګه ګټه پورته شي او معلولیت لرونکو وګړو لپاره د ژوند په مختلفو برخو کې د بنسټیزو پروژو او فرصتونو پر غوښتنه تمرکز وشي.
ښاغلي آریوبي څرګنده کړه، چې د معلولیت لرونکو وګړو د هر اړخیز ملاتړ لپاره د ملي او نړیوالو بنسټونو د پاملرنې او همکارۍ د جلبولو په موخه به د یادې ورځې د غوره نمانځنې لپاره تخنیکي مسولینو سره هم مجالس ترسره کړي.
د جمهور رییس سلاکار عمرا خان منیب د وزارت له لوري د یادې نړیوالې ورځې نمانځل ښه اقدام وګڼه او په دې برخه کې له خپل اړخه د هر ډول همکارۍ او همغږۍ ډاډ ورکړ. وویل: غوره به وي، چې په دغې برنامه کې د معلولیت اړوندو بنسټونو، ملي او نړیوالو ادارو او نورو مرستندویه بنسټونو ته د ګډون فرصت برابر شي، تر څو د معلولینو اړوند چارو ته ښه همغږۍ رامنځته او د همکاري روحیه پیاوړې شي.
