د شهیدانو ورثه ؤ او معلولینو د پالنې په مرکز کې د لسو تنو یتیمانو لپاره د فني او حرفوي زده کړو په برخه کې شپږ میاشتنی روزنیز پروګرام پیل شو

یاد روزنیز پروګرام چې د (HAS) مؤسسې په مالي ملاتړ، د شهیدانو ورثه ؤ او معلولینو د پالنې مرکز رئیس محترم ملا رحمت الله خالد، د فني او حرفوي زده کړو آمر محترم ګل احمد عثماني، د شهیدانو او معلولینو چارو وزارت د نشراتو آمر محترم مولوي محمد یعقوب او د یادې خیریه مؤسسې د مسؤلینو په حضور کې پيل شو، په پام کې ده چې د دې روزنیز پروګرام په ترڅ کې به لسو تنو مستحقو یتیمانو ته د خیاطۍ حرفې په برخه کې زده کړې ورکړل شي.

د شهیدانو ورثه ؤ او معلولینو د پالنې مرکز رئیس محترم ملا رحمت الله خالد د پروګرام په پرانیست غونډه کې د دې ډول پروګرامونو په لاره اچول یې د یتیمانو او معلولینو د اقتصادي ځان بساینې په برخه کې خورا مهم وباله او د شهیدانو او معلولینو چارو وزارت رهبرۍ له ځانګړې پاملرنې او همداراز د یادې مؤسسې له مسؤلینو څخه یې مننه او قدرداني وکړه، د یادونې وړ ده څه موده وړاندې هم د یادې مؤسسې له لوري لسو تنو یتیمانو ته د حرفوي زده کړو زمینه برابره شوې وه.