د کابل ښار د (۱۵) مې ناحیې اړوند پر (۵۰) تنو مستحقو کونډو او ښځينه معلولینو باندې مرستې ووېشل شوې
د شهیدانو او معلولینو چارو وزارت د اړمنو کورنيو د اقتصادي ملاتړ په موخه، د (HPWO) خیریه موسسې په همکارۍ، د کابل ښار په (۱۵) مه ناحیه کې پر (۵۰) تنو کونډو او ښځينه معلولینو باندې د کورنۍ نانوايي د جوړولو په موخه اړين توکي او وسایل ووېشل.
په یادو مرستو کې (۱۸) ډوله بېلابېل وسایل او توکي په پام کې نیول شوي وو، چې هر کورنۍ ته (۵) بورې اوړه، د ګاز بالون، ګازي تنور او د ډوډۍ پخولو لپاره نور اړین وسایل او همداراز د ډوډۍ د خرڅلاو لپاره جوړې شوې غرفې ورکړل شوې.
د مرستو د وېش پرمهال د وزارت د پروژو څخه د څارنې او ارزونې آمر محترم ملا مطیع الله ابوالمختار، د ټولنیزو خدمتونو د تنظیم ریاست استازو او د خیریه مؤسسې مسؤلينو شتون درلود او د وېش له بهیر څخه یې له نږدې څارنه وکړه.
