د کابل ښار د (۱۳) مې ناحیې اړوند پر (۵۰) تنو مستحقو کونډو او ښځينه معلولینو باندې د مرستو وېش
د شهیدانو او معلولینو چارو وزارت د اړمنو کورنيو د اقتصادي ملاتړ په موخه، د یوې خیریه موسسې په همکارۍ، د کابل ښار په (۱۳) مه ناحیه کې پر (۵۰) تنو کونډو او ښځينه معلولینو باندې د کورنۍ نانوايي د جوړولو په موخه، اړين توکي او وسایل ووېشل.
په یادو مرستو کې (۱۸) ډوله بېلابېل وسایل او توکي په پام کې نیول شوي وو، چې هر کورنۍ ته (۵) بورې اوړه، د ګاز بالون، تنور او د ډوډۍ پخولو لپاره نور اړین وسایل، همداراز د ډوډۍ د خرڅلاو لپاره جوړې شوې غرفې او یو اندازه نغدي مرستې ورکړل شوې.
د مرستو د وېش پرمهال د وزارت د مرکز او ولایتونو د راپورونو د تحلیل او توحید آمر محترم مولانا نورالدین صاحبزاده، د ټولنیزو خدمتونو د تنظیم ریاست استازو او د خیریه مؤسسې مسؤلينو شتون درلود او د وېش له بهیر څخه یې له نږدې څارنه ترسرهکړه.
د یادونې وړ ده چې تېره اونۍ هم د کابل ښار په (۱۵) ناحیه کې د (۵۰) تنو مستحقو کونډو سره ورته مرستې ترسره شوې وې.
