د معلولیت لرونکو وګړو لپاره د ملاتړ صندوق د جوړیدو په موخه مشورتي ناسته ترسره شوه
د معلولیت لرونکو وګړو لپاره د ملاتړ صندوق د جوړیدو په موخه مشورتي ناسته ترسره شوه.
د شهیدانو او معلولینو په چارو کې د دولت وزارت لخوا د معلولیت لرونکو وګړو د ملاتړ صندوق د رامینځته کولو په موخه د څلورو وزارتونو او د چارو د ادارې د استازو تر مینځ د غازي آمان الله خان د غونډو په تالار کې مشورتي ناسته ترسره شوه.
په دې ناسته کې د معلولیت په چارو کې د جلالتماب جمهور یس سلاکار ښاغلي عمرا خان منیب د مالیې، عدلیې، د تجارت او صنایعو وزارتونو رئیسانو، د چارو د ادارې استازو او د شهیدانو او معلولینو په چارو کې د دولت وزارت مشرتابه د معلولیت لرونکو وګړو د ملاتړ صندوق پر تخنیکي او حقوقي چارو هر اړخیز بحثونه وکړل.
د شهیدانو او معلولینو په چارو کې ددولت وزارت وزیر ښاغلي لعل الدین آریوبي خوښي وښوده، چې د معلولیت لرونکو وګړو د خدمت او ملاتړ په موخه یو بل ګټور ګام پورته کوي.
نوموړي د یادو وزارتونو رئیسانو او د چارو د ادارې استازو ته د معلولیت لرونکو وګړو د ملاتړ صندوق د اقتصادي ګټو په اړه معلومات وړاندې کړ.
د یادونې وړ ده، چې د معلولیت لرونکو وګړو د ملاتړ صندوق طرحه د شهیدانو او معلولینو په چارو کې د دولت وزارت لخوا جلالتمآب ولسمشر محمد اشرف غني ته وړاندې شوې وه چې له نیکه مرغه د جلالتمآب ولسمشر لخوا تایید شوه او ډیر ژر به یې تخنیکي او حقوقي چارې بشپړې شي.
