د شهیدانو او معلولینو چارو په وزارت کې (۴۵۰) تنو مستحقینو ته د خوراکي توکو وېش
د شهیدانو او معلولینو چارو وزارت د روژې مبارکې میاشتې په مناسبت د شهیدانو کورنیو او معلولینو د لاسنیوي او ملاتړ په موخه، د یوې خیریه مؤسسې سره په همغږۍ پر (۴۵۰) تنو مستحقو یتیمانو، کونډو، معلولینو او اړمنو کسانو باندې مرستې چې په هغه کې اوړه، وریجې، غوړي او درې ډوله نور خوراکي توکي هم شامل وو، په منظم او عادلانه ډول ووېشل.
د یادو مرستو د وېش پر مهال د ټولنیزو خدمتونو د تنظیم رئیس محترم مولوي علاؤالدین سعد، د پروژو څخه د څارنې او ارزونې آمر محترم ملا مطیع الله ابوالمختار، د ټولنیزو خدمتونو د تنظیم آمر محترم صفي الله سدید او د مؤسسې مسؤلينو شتون درلود.
د یادونې وړ ده چې څو ورځې وړاندې هم سلګونو تنو یتیمانو، کونډو او معلولینو ته په دې وزارت ورته مرستې ترسره شوې وې.
