د شهیدانو او معلولینو چارو وزارت یتیمانو، کونډو او معلولینو ته د خوراکي توکو د چمتو کولو په موخه د احساس ټولنیزې خیریه مؤسسې سره هوکړه لیک لاسلیک کړ
یاد هوکړه لیک چې د شهیدانو او معلولینو چارو وزارت د بهرنېو اړیکو او پلان رئیس محترم ملا صدو خان حق شناس او د احساس ټولنیزې خیریه مؤسسې مسؤل محترم شهاب الرحمن اشرف ترمنځ لاسلیک شو چې د هغې پر بنسټ به په پروان ولایت کې یو سل او اوه شپیته (۱۶۷) تنو کونډو، یتیمانو او معلولینو ته د خوراکي توکو مرستې چې په هغه کې اوړه، غوړي، وریجې، مالګه، بوره، لوبیا او چای شامل دي، وویشل شي.
د یاد هوکړه لیک د لاسلیک پر مهال د شهیدانو او معلولینو چارو وزارت د بهرنېو اړیکو او پلان رئیس محترم ملا صدو خان حق شناس د احساس ټولنیزې خیریه مؤسسې له مسؤل څخه وغوښتل چې خپلې مرستې د شهیدانو او معلولینو چارو وزارت سره په همغږۍ ترسره کړي تر څو مرستې واقعي مستحقینو ته ورسیږي.
په ورته وخت کې د یادې مؤسسې مسؤل محترم شهاب الرحمن اشرف د احساس خیریه مؤسسې د فعالیتونو په هکله معلومات وړاندې کړل او یاد قشر ته يې د مرستو د چمتو کولو په برخه کې د پوره همکارۍ ډاډ ورکړ.
د دې پروژې ټوليز ارزښت نه زره او سل (۹۱۰۰) امریکائي ډالره دی چې په پروان ولایت کې به تطبیق شي.
