د شهیدانو او معلولینو چارو وزارت مستحقو یتیمانو او کونډو ته د اقتصادي بساېنې په موخه د ثمرقند افغانستان ټولنیزې مؤسسې سره هوکړه لیک لاسلیک کړ
یاد هوکړه لیک چې د شهیدانو او معلولینو چارو وزارت د بهرنېو اړیکو او پلان رئیس محترم ملا صدو خان حق شناس او د ثمرقند افغانستان ټولنیزې مؤسسې د رئیس محترم عبدالنعیم مخدوم ترمنځ لاسلیک شو چې د هغې پر بنسټ به په لوګر ولایت کې یو سل او درې (۱۰۳) تنو کونډو او یتیمانو ته د اقتصادي ودې په موخه دوه سوه او شپږ (۲۰۶) رأسه د شیدو وزې ورکړل شي.
د یاد هوکړه لیک د لاسلیک پر مهال د شهیدانو او معلولینو چارو وزارت د بهرنېو اړیکو او پلان رئیس محترم ملا صدو خان حق شناس د ثمرقند افغانستان ټولنیزې مؤسسې څخه مننه وکړه چې د دې اړمن قشر (یتیمانو، کونډو او معلولینو) لاسنيوی کوي او د یادې مؤسسې له رئیس څخه يې وغوښتل چې خپلې مرستې د شهیدانو او معلولینو چارو وزارت سره په همغږۍ ترسره کړي تر څو مرستې واقعي مستحقینو ته ورسیږي.
په ورته وخت کې د یادي مؤسسې رئیس محترم عبدالنعیم مخدوم یاد قشر ته د مرستو د چمتو کولو په برخه کې د پوره همکارۍ ډاډ ورکړ.
د دې پروژې ټوليز ارزښت دري دیرش زره او نه سوه نوي (۳۳۹۹۰) امریکائي ډالره دی چې په لوګر ولایت کې به تطبیق شي.
