The process of registration of martyrs' heirs and disables related to Hizb-e-Islami will begin soon

حزب اسلامي پورې اړوند د شهیدانو وارثین او معلولیت لرونکو وګړو د ثبت پروسه به ډیر ژر پیل شي.

په ولسي او سیاسي چارو کې د ولسمشر ستر سلاکار او حزب اسلامي سره د سولې تړونلیک د پلې کولو کمیسیون مشر ښاغلي ضیاالحق امرخیل د شهیدانو او معلولینو په چارو کې د دولت وزیر ښاغلي لعل الدین آریوبي سره د حزب اسلامي اړوند د شهیدانو وارثین او معلولیت لرونکو وګړو د ثبت د پروسې پر میکانیزم او شفافیت خبری وکړی. ښاغلي امرخیل وویل: د حکومت او حزب اسلامي د سولې تړونلیک پر بنسټ حکومت ژمن دی چې په یاد ګوند پورې اړوند د شهیدانو وارثین او معلولیت لرونکي وګړي ثبت او دوي ته کلنۍ حقوق او امتیازات ورکړي. ښاغلي امرخیل هیله څرګنده کړه چې یاد وزارت به ددې تړونلیک په پلې کولو کې بشپړه همکاري وکړي.

د شهیدانو او معلولینو په چارو کې د دولت وزیر ښاغلي لعل الدین آریوبي له حزب اسلامي سره د سولې تړونلیک د پلې کولو کمیسیون کارونه وستایل او زیاته یې کړه، چې د شهیدانو او معلولینو په چارو کې د دولت وزارت تخنیکي او حقوقي کمیټو په دې اړوند څو پرله پسې ناستې کړي. تخنیکي کارونه یې بشپړ شوي او د نافظه قوانینو، طرزالعملونو او د تړونلیک له مخې به ډیر ژر د یادو شهیدانو د وارثینو او معلولیت لرونکو وګړو د ثبت پروسه رسمآ پیل شي.