د شهیدانو او معلولینو چارو وزارت او د مسلم هنډز نړیوالې (MHI) مؤسسې ترمنځ هوکړه لیک لاسلیک شو
د شهیدانو او معلولینو چارو وزارت د یتیمانو لپاره د ژوند د ښه فرصتونو برابرولو په موخه د مسلم هنډز نړیوالې مؤسسې سره د (۶۶) زره او (۷۵) ډالرو په ارزښت د همکارۍ هوکړه لیک لاسلیک کړ.
د دې هوکړه لیک پر اساس به، د کابل، کنړ، پروان، ننګرهار، لوګر، پکتیا، غزني، کاپیسا، میدان وردګ او خوست ولایتونو اړوند (۱۴۴) تنو مستحقو یتیمانو لپاره نغدي مرستې ووېشل شي او هر یتیم به (۱۸۵۰۰) افغانۍ ترلاسه کړي، د دې ترڅنګ، (۵۶) تنو نورو یتیمانو ته به خوراکي توکي چمتو شي.
یاد هوکړه لیک د بهرنیو اړیکو، پلان او تقنین چارو رئيس محترم مولوي ثناء الله فرقاني او د مسلم هندز نړیوالې (MHI) مؤسسې رئیس محترم محمد آصف فولاد ترمنځ لاسلیک شو او د یادو ولایتونو د شهیدانو او معلولینو چارو ریاستونو سره په همغږۍ به تطبیق شي.
محترم مولوي ثناء الله فرقاني د یاد هوکړه لیک د لاسلیک پر مهال د یتیمانو، کونډو او معلولینو اړتیاوې او غوښتنې د مؤسسې له مسؤل سره شریکې کړې، د دې زیانمن شوي قشر لپاره د اړینو اسانتیاوو برابرول یې د ټولو ګډ مسؤلیت وباله او د هغوی پر دوامدار ملاتړ یې ټینګار وکړ.
