د شهیدانو او معلولینو چارو وزارت د دعوت او ارشاد ریاست د دې وزارت له اړوندو کارکوونکو څخه د دیني موضوعاتو ازموینه واخیستله
د شهیدانو او معلولینو چارو وزارت د دعوت او ارشاد ریاست له لوري د دې وزارت کارکوونکو ته د دیني مسائلو د زده کړې په برخه کې یو منظم تدریسي پروګرام پېل شوی دی، چې په هغه کې د وزارت اړوند کارکوونکو ته د عقیدوي او فقهي مسائلو په برخو کې زده کړې ورکول کېږي، د کارکوونکو د ارزونې په موخه، نن د ځانګړي پروګرام په ترڅ کې له هغوی څخه په تحریري او تقریري بڼه ازموینه واخیستل شوه.
یاده ازموینه د دعوت او ارشاد ریاست د آمرینو او کارکوونکو په شتون کې په منظم ډول د حضرت حمزه رضي الله تعالی عنه جومات کې چې د دې وزارت په انګړ کې موقعیت لري، واخیستل شوه، د دې ازموینې اساسي موخه د هغوی عقیدوي او فقهي مسائلو او موضوعاتو ارزول وو ، چې د څو میاشتو په اوږدو کې کارکوونکو ته تدریس شوي وو.
په ورته وخت کې د وزارت اړوند کارکوونکو هم په پوره لېوالتیا او چمتووالي سره په ازموینه کې ګډون وکړ، په پرله پسې او منظم ډول یې پوښتنو ته ځوابونه وړاندې کړل او د ازموینې ټول بهیر د انضباط او همغږۍ په فضا کې ترسره شو.
د یادونې وړ ده چې ازموینه د کارمندانو څخه په تحریري بڼه او د خدماتي کارکوونکو څخه په شفاهي(تقریري) ډول واخیستل شوه او هغه ګډونوال چې په دې ازموينه کې لوړۍ نمرې ترلاسه کړي د شهيدانو او معلولینو چارو وزارت د رهبرۍ له لوري به وستایل شي.
