د شهيدانو او معلولینو چارو وزارت سرپرست وزير محترم الحاج ملا عبدالمجید آخند سمنګانو ولايت ته سفر وکړ
د شهيدانو او معلولینو چارو وزارت سرپرست وزير محترم الحاج ملا عبدالمجید آخند چې د یاد وزارت د دفتر رئيس محترم قاري شاه محمد دوست یې ملتیا کوله، سمنګانو ولايت ته د سفر په ترڅ کې د یاد وزارت اړوند رياست کړنو، اجراآتو، فعاليتونو او کاري بهیر څخه یې لیدنه او ارزونه ترسره کړه.
د یادې ارزونې په ترڅ کې محترم الحاج ملا عبدالمجید آخند د سمنګانو ولايت د شهيدانو او معلولینو چارو رياست مسؤلینو ته وويل: "هغه حقوق او نغدي مرستې چې د اسلامي امارت لخوا د یتیمانو، کونډو او معلولینو لپاره ټاکل شوي دي، هغه باید پرته له هر ډول درغلۍ او سرغړونې څخه مستحقو کسانو ته ورکړل شي."
د یاد ریاست د ارزونې پر مهال د شهيدانو او معلولینو چارو وزارت د دفتر رئيس محترم قاري شاه محمد دوست سمنګانو ولایت ته د شهيدانو او معلولینو چارو وزارت سرپرست وزير محترم الحاج ملا عبدالمجید آخند د سفر موخه یتیمانو، کونډو او معلولینو ته د میاشتنې نغدي مساعدتونو د ورکړې د څرنګوالي ارزونه وبلله او زياته یې کړه: د شهيدانو او معلولینو چارو وزارت سره تر دې تر دمه شپږ لکه پورې یتیمان، کونډې او معلولین ثبت شوي چې په هغه کې درې لکه او پنځوس زره (۳۵۰۰۰۰) تنه یتیمان، نوي زره (۹۰۰۰۰) تنه کونډې او یولک او یو اتیا زره (۱۸۱۰۰۰) معلولين شامل دي. نوموړي همداراز زیاته کړه یاد وزارت تر اوس مهاله اتیا فیصده یتیمانو، کونډو او معلولینو ته د طرزالعمل مطابق میاشتنۍ نغدي مساعدتونه تادیه کړي دي.
په ورته وخت کې د شهیدانو او معلولینو چارو سرپرست وزير د یاد ریاست د کاري بهیر د ارزونې سربېره له یو شمېر معلولینو سره له نږدې وکتل د هغوی ستونزې او غوښتنې یې واورېدې او ورسره یې یوه اندازه نغدي مرسته هم ترسره کړه.
