د شهيدانو او معلولينو چارو سرپرست وزير د تخار او کندز ولايتونو له معلولينو استازو سره وکتل
د شهيدانو او معلولينو چارو سرپرست وزير د تخار او کندز ولايتونو له معلولينو استازو سره وکتل
نن سه شنبه د کب ۱۹مه، د شهيدانو او معلولينو چارو سرپرست وزير پوهنمل حميدالله فاروقي د تخار او کندوز ولايتونو د معلولينو استازو سره وکتل او د معلولينو ستونزو په تړاو يې ورسره خبرې اترې وکړې.
د ناستې په پيل کې د تخار او کندز ولايتونو د معلولينو استازو ښاغلي فاروقي ته د نوي مسووليت مبارکي ورکړه او په چارو کې يې ورته د برياوو هيله وکړه.
د ناستې ګډونوالو له ښاغلي فاروقي سره، د معلوليت لرونکو وګرو د معاشونو د ځنډ، سرپناه، زدکړو، کارموندنې، بانکي سازۍ، برېښنايي سیسټم، د برېښنايي تذکرو ويش، د معلولينو ملي فدراسیون جوړيدو په برخو کې موجوده ستونزې شريکې کړي او د حل غوښتنه يې وکړه.
د شهيدانو او معلولينو چارو سرپرست وزير پوهنمل حمدالله فاروقي، ددوی له راتګ او مبارکۍ څخه مننه وکړه او د ملي ګټو ،خاورې، ملي ارزښتونو او ناموس څخه د دفاع په برخو کې يې ددوی د قربانيو او سرښندنو ستاینه وکړه.
د ښاغلي فارقي په خبره، چې څلور لسیزې تحميلې جګړې د افغانانو لپاره له ويجاړۍ، تباهۍ او وژنو پرته بل څه په ميراث نه دي پريښي او لا هم هره ورځ د همدې ناوړه جګړې له امله د شهيدانو او معلولينو شمير مخ پر زياتېدو دی.
ښاغلي فاروقي له وزارت سره د معلوليت لرونکو وګړو د همغږۍ پر زياتوالي ټينګار وکړ او د معلولينو ملي فدراسيون جوړيدل يې اړين او مهم وګڼل، څو له دې لارې معلولين د يو بالقوه ادرس خاوندان شي او د عدالت غوښتنې ناره يې په اغيزناکه توګه واوريدل شي.
دده په خبره، د شهيدانو او معلولينو چارو وزارت ژمن دی، چې له شته امکاناتو او سرچينو څخه په اعظمي ګټې اخيستنې سره د شهيدانو ورثې او معلوليت لرونکو وګړو ستونزو ته رسيدنه وکړي او د ژوند په ټولو برخو کې ورته لازمې اسانتياوې برابرې کړي.
نوموړي څرګنده کړه، چې له ښاروالۍ سره په همغږۍ به په مرکز او ولايتونو کې د معلولينو لپاره د کاري زمينې برابرولو په موخه عرفي توزیع شي او له نورو دولتي ادارو سره د شويو هوکړه ليکونو د پلې کولو لپاره هم هڅې روانې دي.
په پای کې د تخار او کندز ولايتونو د معلولينو استازو ښاغلي فاروقي ته د مبارکۍ او درناوي په پار چپنه ډالۍ کړه.
