د شهيدانو او معلولينو چارو سرپرست وزير د مراجعينو نظرونه، غوښتنې او وړانديزونه واوريدل
د شهيدانو او معلولينو چارو سرپرست وزير د مراجعينو نظرونه، غوښتنې او وړانديزونه واوريدل
نن سه شنبه د کب ۱۸مه، د شهيدانو او معلولينو چارو سرپرست وزير پوهنمل حميدالله فاروقي د وزارت په انګړ کې د مراجعينو ستونزې، غوښتنې، وړاندیزونه او غوښتنې واوريدې او د حل لپاره يې ډاډ ورکړ.
ښاغلي فاروقي مراجعينو ته په خپلو خبرو کې زياته کړه، چې د وزارت ټول چارواکي او کارکوونکي د مراجعينو په خدمت کې دي او دوی مسوليت لري چې ستاسو کارونو او ستونزو ته پر وخت رسيدنه وکړي.
نوموړي د وزارت له مراجعينو څخه وغوښتل چې د وزارت مسوولينو لخوا د چارو د ځنډ او خنډ په صورت کې دې له ده سره اړيکه کې شي، څو ستونزو ته يې په چټکه توګه رسيدنه وشي.
د شهيدانو او معلولينو چارو سرپرست وزير د معاشونو د ځنډ پوښتنې په ځواب کې وويل: چې د شهيدانو ورثې او معلوليت لرونکو وګړو اسنادو له منځ څخه د خيالي اسنادو پاکولو او باطلولو څخه وروسته، کوم چې د جمهوري رياست د حکم پر بنسټ د رامنځته شوې کميټې له لوري کتل او ارزول کېږي، پاتې حقوق به د ټولو مستحقو کسانو لپاره حواله شي.
ښاغلي فاروقي د شهيدانو ورثې او معلوليت لرونکو وګړو څخه غوښتنه وکړه، چې د فساد مخنيوی او د روڼتيا ټينګښت په موخه دې ژر تر ژره برېښنايي تذکرې واخلي، څو د ۱۴۰۰ھ ل کال لپاره خپل حقوق ترلاسه کړي.
