په غزني ولایت کې د مجردو شهیدانو کورنیو سره نغدي مرستې ترسره شوې
د غزني ولايت د شهیدانو او معلولینو چارو رئيس محترم ملا عبدالحکیم دانش په مشرۍ يو پلاوي زنخان او واعظ ولسواليو ته د سفرونو په ترڅ کې د مجردو شهیدانو کورنیو سره ليدنه وکړه، د هغوی احوال یې له نږدې واخیست، ستونزې او غوښتنې یې واوریدې او اړتیاوو ته یې د بشپړې رسېدنې ډاډ ورکړ.
نوموړي د یادو کورنیو د اقتصادي ستونزو د کمولو په موخه نغدي مرستې هم ووېشلې.
همداراز، یتیمانو، کونډو او معلولینو ته د اغېزمنو او غوره خدمتونو د وړاندې کولو او د کور په کور سروې د بهیر د لا ښه تنظیم او چټکتیا په موخه، اړوندو مدیرانو ته لازمې سپارښتنې او لارښوونې وشوې.
د دغو سفرونو پر مهال د شهیدانو او معلولینو چارو رئیس د یادو ولسوالیو له مسؤلینو سره هم لیدنې وکړې او له هغوی یې وغوښتل چې د شهیدانو له کورنیو او معلولینو سره د لا ډېرو همکاریو او خدمتونو په برخه کې خپلې مرستې دوامدارې وساتي.
