د شهیدانو او معلولینو چارو په وزارت کې (۳۰) تنو مستحقینو باندې زرنج نقليه وسایط ووېشل شول
د شهیدانو او معلولینو چارو وزارت د یتیمانو کورنیو او معلولیت لرونکو وګړو د اقتصادي ځان بسیاینې، د بېوزلۍ د کچې د کمولو او هغوی ته د دوامداره عاید سرچینو د برابرولو په موخه، د یوې خیریه مؤسسې په مالي ملاتړ پر (۳۰) تنو یتیمانو او معلولینو زرنج موټرسايکلونه ووېشل.
د یادو مرستو موخه دا ده چې مستحق کسان وکولای شي د کوچنیو کاروبارونو له لارې خپل ورځنی عاید زیات کړي او د خپلې کورنۍ اقتصادي اړتیاوې په ښه ډول پوره کړي.
د دغو مرستو مستحق کسان د کابل، ننګرهار، لغمان، پروان، کاپیسا، ميدان وردګ او لوګر ولایتونو څخه وو، چې د یتیمانو کورنیو او معلولیت لرونکو وګړو له ډلې انتخاب شوي وو.
د مرستو د وېش پر مهال د ټولنیزو خدمتونو د تنظيم رئيس محترم مولوي علاؤ الدين سعد، د ټولنیزو خدمتونو رياست آمرينو محترم ملا ابراهیم شاه خلیل او محترم صفي الله سدید، د څارنې او ارزونې رياست استازو، د يادو ولايتونو د شهیدانو او معلولینو چارو رياستونو استازو او د خیريه مؤسسې مسؤلينو شتون درلود.
د یادونې وړ ده چې د شهیدانو او معلولینو چارو وزارت تر دې وړاندې هم په بغلان، کندز، تخار، هلمند او ځینو نورو ولایتونو کې یتیمانو او معلولینو ته ورته مرستې ترسره کړې وې.
