د شهیدانو او معلولینو چارو وزارت او ژوند د هوساینې او پرمختګ مؤسسې تر منځ د هوکړه لیک لاسلیک
د شهیدانو او معلولینو چارو وزارت د یتیمانو د ملاتړ او د هغوی د لاسنیوي په موخه، ژوند د هوساینې او پرمختګ مؤسسې سره د همکارۍ هوکړه لیک لاسلیک کړ.
یاد هوکړه لیک د (۲۴) زره او (۴۶۵) ډالرو په ارزښت د دې وزارت د بهرنيو اړیکو او پلان رئیس محترم ملا صدوخان حق شناس او ژوند د هوساینې او پرمختګ مؤسسې د مسؤل محترم محمد نعیم روحاني ترمنځ لاسلیک شو، چې پر اساس به یې په لغمان او ننګرهار ولایتونو کې (۲۳۰) تنو مستحقو یتیمانو لپاره خوراکي او غیر خوراکي توکي چمتو او ووېشل شي.
محترم ملا صدو خان حق شناس د هوکړه لیک د لاسلیکولو پر مهال یتیمانو او معلولینو ته د مرستو د چمتو کولو په پار د یادې خیریه مؤسسې له مسؤل څخه مننه وکړه، او له هغه یې وغوښتل چې د ټولنې د دې اړمن قشر لپاره لازیاتې مرستې برابرې کړي.
د یادونې وړ ده چې یاده پروژه د یوې میاشتې په موده کې د لغمان او ننګرهار ولایتونو د شهیدانو او معلولینو چارو ریاستونو سره په همغږۍ به تطبیق شي.
