د شهیدانو او معلولینو چارو وزارت اړوند رئیسانو او آمرینو ته د کارکوونکو د اجراآتو د ارزونې په تړاو د پوهاوي یو ورځنی سیمینار دایر شو
د شهیدانو او معلولینو چارو وزارت اړوند رئیسانو او آمرینو ته د کارکوونکو اجراآتو د ارزونې د څرنګوالي په موخه د اداري اصلاحاتو او ملکي خدمتونو ادارې د استادانو له لوري د پوهاوي یو ورځنی سیمینار وړاندې شو.
د سیمینار په پېل کې د شهیدانو او معلولینو چارو وزارت د مالي او اداري چارو عمومي رئیس محترم مولوي کلیم الله افغان د کارکوونکو د اجراآتو د ارزونې اصلي موخه، د کارکوونکو د وړتیاوو او استعدادونو دقیقه ارزونه، د شته نیمګړتیاوو او ستونزو پیژندنه او په سمه توګه د ورسپارل شویو مسؤلیتونو د ترسره کولو څخه ډاډ ترلاسه کول وبلل.
محترم مولوي کلیم الله افغان د وزارت اړوند رئیسانو او آمرینو ته په خطاب کې وویل: د اسلامي امارت او ملت د عزت ساتنه ستاسو په لاسونو کې ده. اړینه ده چې سپارل شوې چارې په صداقت، ایماندارۍ او بشپړ اخلاص سره ترسره کړې، ځکه چې د افغان ملت غوښتنه دا ده چې ستاسو د مؤثر او کارآمد مدیریت په ترڅ کې د هغوی د هوساینې لپاره کوټلي ګامونه پورته شي.
په دې سیمینار کې د کارکوونکو چارو رئیس محترم مولوي محمد موسی صدیقي د کارکوونکو د اجراآتو د ارزونې پروسې د څرنګوالي په تړاو خبرې وکړې او زیاته یې کړه: د کارکوونکو چارو ریاست، د چارو ادارې لوی رياست څخه د رالېږل شوي لارښود پر اساس د دې وزارت کارکوونکو د اجراآتو او کړنو د ارزونې لپاره یو جامع لارښود ترتیب کړی دی، د دې لارښود په رڼا کې به د رئیسانو، آمرینو او ټاکل شوې کمېټې لخوا د کارکوونکو اجراآت په منظم ډول و ارزول شي تر څو د کارکوونکو وړتیاوې او کاري استعدادونه وپېژندل شي.
همداراز د ملکي خدمتونو د پالیسیو او حقوقي چارو مرستیال محترم عزت الله امان د کارکوونکو د اجراآتو او کړنو د ارزونې پروسې پر اهمیت خبرې وکړې او وې ویل: د کارکوونکو د اجراآتو ارزونه چې د هغوی د طرز سلوک، د دندو لایحو او کاري پلان پر اساس ترسره کېږي د بشپړ شفافیت د رامنځته کولو، د عدالت تأمینولو او د نظام څخه د خلکو د رضایت زیاتولو لامل ګرځي همداراز دا پروسه به د انساني منابعو مؤثر کارول تضمینوي او د نظام په هکله به د خلکو باور پیاوړی کړي.
د اطلاعاتو او عامه اړیکو رئیس محترم مفتی فیصل خاموش د سیمینار د جوړولو په هکله معلومات وړاندې کړل او ډاډ یې ورکړ چې د کارکوونکو د اجراآتو ارزونې پروسه به، په بشپړ شفافیت او منظم ډول پر مخ یوړل شي.
په پام کې ده چې د شهیدانو او معلولینو چارو وزارت د کارکوونکو د اجراآتو ارزونه به د یوې باصلاحیته کمېټې له لوري په نوبت وار ډول د ټاکل شوو معیارونو پر اساس ترسره شي.
