د شهیدانو او معلولینو چارو وزارت د ملاتړ صندوق د طرزالعمل د ترتيبولو په موخه ټاکل شوې کمېټې غونډه ترسره کړه
د یتیمانو او معلولینو د ملاتړ صندوق د طرزالعمل د ترتيبولو په موخه ټاکل شوې کمېټه چې څه موده وړاندې جوړه شوې وه، نن یې د دې وزارت د بشري سرچینو په رياست کې غونډه ترسره کړه.
په یاده غونډه کې د یتیمانو او معلولينو د حمایوي صندوق د کړنلارې او د حمایوي صندوق څخه د مستحقو کسانو لپاره د ګټې اخيستنې د څرنګوالي او د یاد صندوق د لا تمویلولو په تړاو هر اړخیزې خبرې وشوې.
په دې غونډه کې د بشري سرچینو رئیس محترم مولوي محمد موسی صدیقي، د دعوت او ارشاد رئیس محترم مفتي عبدالاحد مسعود، د وزارت د دفتر ریاست کارمند محترم سید محمد هاشمي او د دغې کمېټې نورو غړو ګډون کړی وو.
د یادولو وړ ده چې د دې کړنلارې په نهايي کیدو سره به د مالیې محترم وزارت له خوا یو بانکي حساب پرانیستل شي.
د يادونې وړ ده، چې دا حمایوي صندوق څه موده وړاندې د يتيمانو، کونډو، معلولينو او اړمنو کسانو د ملاتړ په موخه جوړ شوى وو، چې له ياد صندوق سره د شهيدانو او معلولينو وزارت مسؤلين او کارکوونکي په خپله خوښه او مالي توان په اندازه هره مياشت مرسته کوي.
