د شهیدانو او معلولینو چارو وزارت یو پلاوي په دایکندي ولایت کې د یاد وزارت اړوند ریاست له کړنو او فعالیتونو هراړخیزه ارزونه وکړه
د شهیدانو او معلولینو چارو وزارت د څارنې او ارزونې رئیس ښاغلي مولوي نورالحق حقاني په مشرۍ یو پلاوي په دایکندي ولایت کې د یاد وزارت اړوند ریاست کړنې او فعالیتونه په هراړخیزه توګه وڅیړل.
د دې څیړنې په ترڅ کې د یاد وزارت د څارنې او ارزونې رئیس ښاغلي مولوي نورالحق حقاني د یاد ریاست کارکوونکو ته خبرې وکړې او زیاته یې کړه: مسؤلیت امتیاز نه بلکه امانت دی موږ ټول ددې بیوزله او اړمن قشر (د شهیدانو وارثینو او معلولینو) پر وړاندې مسؤل یو او اړینه ده چې هغوی ته د غوره خدمتونو وړاندې کولو زمینه برابره کړو.
مؤظف پلاوي د دې سفر په ترڅ کې د شهیدانو وارثینو او معلولیت لرونکو وګړو اړوند اسناد په هراړخیزه توګه وڅیړل او په پام کې ده چې یتیمانو، کونډو او معلولینو د تثبیت په پروسه کې د شفافیت د تشخیص او د هغوی پر وړاندې د شته ستونزو او ننګونو د حل په موخه د یاد ولایت ځینو ولسوالېو ته سفر وکړي او د شهیدانو وارثینو او معلولینو سره له نږدې وګوري.
د يادونې وړ ده، چې یاد پلاوي له دې وړاندې د باميانو ولايت د شهيدانو او معلولينو رياست کړنې او فعاليتونه څېړلي او په پام کې ده چې د غور ولايت د شهيدانو او معلولينو رياست چارې او فعالیتونه به هم تر څیړنې لاندې ونیسي.
