په نوي کال کې بايد ژمنتيا او چلندونه بدلون ومومي
په نوي کال کې بايد ژمنتيا او چلندونه بدلون ومومي
)سه شنبه، ۳وری(
د شهيدانو او معلولينو چارو وزارت د رهبري هئيت په حضور کې د ښځو له نړيوالې ورځې او ۱۴۰۰ ھ لمريز کال راتګ څخه نمانځنه وکړه.
په پيل کې د شهيدانو او معلولينو چارو سرپرست وزير پوهنمل حميدالله فاروقي د ښځو نړيوالې ورځې او د نوی کال په مناسبت ګډونوالو ته مبارکي وويله او د پايدارې او باعزتې سولې د ټينګښت هيله يې څرګنده کړه.
ښاغلي فاروقي د وزارت له ټولو مسوولینو څخه وغوښتل چې، په نوي کال کې بايد د شهيدانو ورثې او معلوليت لرونکو وګړو سره په چلندونو او ژمنتياوو کې مثبت بدلون راولي.
ښاغلي فاروقي څرګنده کړه، څرنګه چې د شهيدانو ورثې او معلوليت لرونکو وګړو د افغانستان لپاره سرښندنې کړې؛ نو حق لري چې قربانيو ته يې په درنه سترګه وکتل شي او ستونزو ته يې پر وخت رسیدنه وشي.
د شهيدانو او معلولينو چارو سرپرست په وزارت کې د پراخو اصلاحاتو راوستو او له فساد سره د جدي مبارزې يادونه وکړه وويل: چې فساد یوه ناوړه او ملي ارزښتونو ته زيان رسوونکې پديده ده او پر وړاندې يې بايد ټول په ګډه په هر اړخيز ډول مبارزه وکړو.
نوموړي زياته کړه، چې د اسنادو او وثيقو د کتنې او ارزونې کمېټه بايد د شهيدانو ورثې او معلولينو اسنادو د ارزونې پروسه چټکه کړي، پاک او ناپاک اسناد تشخيص او سره جلا کړي.
ښاغلي فاروقي همدارنګه د واحدې دريڅې لپاره د زياتو اسانتياوو په رامنځته کولو ټينګار وکړ وويل: دا مرکز بايد په يو ريښتيني خدماتي مرکز بدل شي او له لارې يې د ټولو مراجعينو کاري طی مراحل پروسې ترسره او د مراجعينو له سرګردانيو څخه مخنيوی وشي.
دده په خبره، چې بايد روان کال د شهيدانو ورثې او معلولينو ترمنځ شته فاصله له منځه ولاړه شي او ټول چارواکي خپل اړوند مسوليتونه په غوره بڼه ترسره کړي.
هغه د خدمتونو په وړاندې کولو بهير کې ځنډ او خنډ د هېڅ ډول منلو وړ ونه ګڼل.
د ناستې په اوږدو کې د شهيدانو او معلولينو چارو وزارت د جنډر سلاکارې صفيې صديقي هم خبرې وکړې او ګډونوالو ته يې د ښځو نړيوالې ورځې او نوي کال په مناسبت مبارکي وويله.
د نمانځهونډې په پای کې د وزارت فعالې او زيارکښې مېرمنې په ډاليو او ستاینلیکونو ونازول شوې.
