د شهيدانو او معلولينو په چارو کې د دولت وزير لعل الدين آريوبي خوست کې د اسنادو او وثیقو د څېړنې کمېټې له غړو سره وکتل
د شهيدانو او معلولينو په چارو کې د دولت وزير لعل الدين آريوبي خوست کې د اسنادو او وثیقو د څېړنې کمېټې له غړو سره وکتل
د ولايتي سفر په ترڅ کې د شهيدانو او معلولينو په چارو کې د دولت وزير ښاغلي لعل الدين آريوبي، د خوست والي محترم محمد صدیق پتمن په ګډون، د ولايت د شهيدانو او معلولينو چارو د اسنادو او وثیقو د څېړنو کمېټې غړو سره ليدنه وکړه.
په دې ليدنه کې د خوست د محکمې، لويې څارنوالۍ، عامې روغتيا، د احصايې او معلوماتو ادارې او ملي امنيت رئيسانو ، باصلاحیته استازو او د شهيدانو او معلولينو چارو آمر ګډون درلود.
محترم آريوبي صيب، د شهيدانو او معلولينو چارو د اسنادو د څيړنې کمېسيون غړو سره د ياد کمېسيون پر کار او د اسنادو د څيړنو پروسې د لا شفافيت په موخه د برېښنايي پېژندپاڼو د وېش پر چټکتيا خبرې وکړې.
ښاغلي آريوبي اړوندو ادارو ته سپارښتنه وکړه، چې د شهيدانو وارثينو، کورنيو غړو او معلوليت لرونکو وګړو ستونزو ته دې پر وخت رسېدنه وکړي.
د ناستې په پای کې د شهيدانو او معلولينو چارو د اسنادو څېړنې کميسيون غړو له محترم وزير لعل الدين آريوبي او مل پلاوي څخه مننه وکړه، چې د ياد ولايت د شهيدانو وارثينو او معلوليت لرونکو وګړو غوښتنې، ستونزې، وړاندېزونه يې له نږدې واورېدل او په همدې موخه يې خوست ته سفر را وکړ. د کمیسیون غړو وویل: خوست کې د اسنادونو د څیړلو پروسه دوام لري او ډیر ژر به هغه اسنادونه چې په ناقانونه توګه ثبت شوي تثبیت او رد شي.
ښاغلي آريوبي د شهيدانو او معلوليت لرونکو وګړو د اسنادو پروسې پر شفافيت او روڼتيا د ټينګار تر څنګ، د وزارت له اړخه له ټولو مسولو ولايتي چارواکو سره د هر ډول همکاريو ژمنه وکړه او له وزارت سره د ولايتي اړوندو ادارو د همغږۍ د زياتوالي لارښوونه وکړه.
