په ۱۴۰۲ کال کې د ننګرهار ولايت د شهيدانو او معلولینو چارو رياست د خیریه بنسټونو او مؤسسو سره په همغږۍ پر (۹۰۰۰) مستحقو کورنېو باندې مرستې ویشلي دي
د ننګرهار ولايت د شهيدانو او معلولینو چارو رئيس محترم صابر ځواک یوه خبري کنفرانس له لارې په تېرو څو مياشتو کې د دې ریاست لاسته راوړنې او پرمختګونه د رسنېو سره شریک کړل.
د ښاغلي صابر ځواک په وینا دې ریاست تر دې دمه (۲۶۰۶۰) تنه يتيمان، (۸۱۰۰) تنه کونډې (۹۱۸۰) تنه معلولين ثبت او راجسټر کړي او هغوی ته د شهیدانو او معلولینو چارو وزارت له طرحې سره سم په شفاف ډول میاشتنې نغدي مساعدتونه ورکړل شوې دي.
هغه زياته کړه: په دې ولايت کې د یتیمانو، کونډو او معلولینو د ثبت او راجسټر په پروسه کې د پوره شفافیت د رامنځته کولو، د جعل او تذویر او تکراري نوملیکنې د مخنيوي په موخه د بایومټریک او د ډېټابېس منظم سیسټم رامنځته شوی دی.
هغه همداراز وويل: هغو کسانو چې په تېر کال کې نږدې څلور ميليونه افغانۍ په جعل او تذویر اخیستې وې له هغوی څخه بېرته راګرځول شوي او بيت المال ته تسليم شوې دي.
هغه زیاته کړه: دې ریاست په روان کال کې د خيريه بنسټونو سره په همغږۍ (۹۰۰۰) مستحقو يتيمانو او معلولينو کورنېو ته په بېلابېلو برخو کې مرستې ويشلي چې په هغه کې خوراکي او غير خوراکي توکي، نغدي مرستې، ژمني توکي او همداراز ويلچرونه شامل دي.
