د شهیدانو او معلولینو چارو وزارت با صلاحیته پلاوي په پکتیکا ولایت کې د یاد وزارت د اړوند ریاست له کړنو او فعالیتونو هر اړخیزه ارزونه وکړه
د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني د یو با صلاحیته پلاوي په مشرۍ په پکتیکا ولایت کې د نوموړي وزارت د اړوند ریاست له فعالیتونو او کړنو هر اړخیزه ارزونه وکړه.
ښاغلي شیخ صاحب عبدالحکیم حقاني د خپل سفر اصلي موخه د یاد ریاست پر وړاندې د پرتو ستونزو او خنډونو له منځه وړل او يتيمانو، معلولينو او کونډو ته د شفافو او پر وخت خدمتونو د وړاندې کولو د څرنګوالي ارزونه وبلله.
نوموړي همدا راز زیاته کړه: په هیواد کې د وروستیو ۴۳ کلنو جګړو له امله زموږ زیات شمیر هیوادوال یتیمان او معلول شوي دي. نوموړي د شهیدانو او معلولینو چارو وزارت د جوړېدو اساسي موخه یتیمانو، کونډو او معلولینو پر وړاندې د پرتو ستونزو او ننګونو حل وباله، هغه همداراز د بودیجې پر وخت او پر شفاف ډول مصرفولو هم ټینګار وکړ.
د يادونې وړ ده چې د یاد پلاوي په تشکيل کې د شهيدانو او معلولينو چارو وزارت د داخلي تفتيش رئیس ښاغلی مولوي احسان الله حقاني او د شهيدانو او معلولينو چارو وزارت د څارنې او ارزونې رئیس ښاغلی مولوی نورالحق حقاني هم شامل دي.
