په ارزګان ولایت کې (۴۰۰) مستحقو کسانو ته مرستې ووېشل شوې
دوشنبه د ۱۴۰۵ کال د تلې ۲۰ مه
د ارزګان ولایت د شهیدانو او معلولینو چارو ریاست د یوې خیریه مؤسسې په مالي ملاتړ په یاد ولایت کې (۴۰۰) تنو مستحقو یتیمانو، کونډو او معلولینو باندې د خوراکي توکو مرستې چې په هغه کې اوړه، وریجې، غوړي او ځینې نور خوراکي توکي شامل وو، په عادلانه او منظم ډول مستحقو کسانو ته ووېشل.
یادې مرستې د ارزګان ولایت د شهیدانو او معلولینو چارو رئيس محترم مولوي عتیق الله منظور، د ولایت مقام، د کار او ټولنیزو چارو ریاست استازو او د خیریه مؤسسې د مسؤلینو په شتون کې مستحقینو ته ورکړل شوې.
محترم مولوي عتیق الله منظور د خیریه مؤسسې له مرستو څخه د مننۍ ترڅنګ، په نورو خیریه بنسټونو او مؤسساتو یې هم غږ وکړ چې د یاد ریاست سره په همغږۍ د ټولنې د دې اړمن قشر لپاره لا زیاتې مرستې برابرې کړي.
