د شهیدانو او معلولینو چارو وزیر محترم الحاج ملا عبدالمجید آخند غور ولایت ته سفر وکړ
د شهیدانو او معلولینو چارو وزیر محترم الحاج ملا عبدالمجید آخند چې د دعوت او ارشاد رئیس محترم مفتي عبدالاحد مسعود، د مرکزي تفتیش آمر محترم مولوي امان الله جمالي، د شهیدانو ورثه وو او معلولینو د ادغام آمر محترم ملا ابراهیم شاه خلیل یې ملتیا کوله، غور ولایت ته یې د مجردو شهیدانو کورنیو د احوال اخیستلو د هغوی سره یې د مرستو ترسره کولو په موخه سفر وکړ، د یاد ولایت د شهیدانو او معلولینو چارو ریاست له فعالیتونو څخه یې لیدنه وکړه او د چارو د ښه والي په موخه یې لازمې لارښوونې وکړې.
همداراز محترم الحاج ملا عبدالمجید آخند د غور ولایت د علماوو شورا له رئیس او مرستیال، د امنیه قوماندان، د ولايت مقام استازي او یو شمېر نورو مسؤلینو سره وکتل. په دې لیدنه کې د شهیدانو ورثه وو او معلولینو ستونزې يې له نږدې واوریدې، د حل او رسیدګۍ په برخه کې لازمې سپارښتنې وکړي.
د شهیدانو او معلولینو چارو محترم وزیر د کارکوونکو او مراجعینو لپاره د لا زیاتو اسانتیاوو د رامنځته کولو په موخه د شهيدانو او معلولينو چارو په رياست کې د یو محراب جومات د بنسټ ډبره کېښوده، څو مراجعین او کارکوونکي وکولای شي خپل لمونځونه او عبادتونه په ارامه، پاکه او ډاډمنه فضاء کې اداء کړي.
همداراز محترم وزیر صاحب د مجردو شهیدانو له کورنیو او د نابینا معلولینو سره دليدنې په ترڅ کې د هغوی ستونزې او غوښتنې واورېدې او له دوی سره یې یوه اندازه نغدي مرسته هم ترسره کړه.
په ورته وخت کې د غور ولایت د شهیدانو ورثوو او معلولینو د محترم وزیر صاحب د سفر تود هرکلی وکړ او دا یې یو مهم او ارزښتناک ګام وباله. هغوی څرګنده کړه چې د شهیدانو او معلولینو چارو وزارت رهبري تل د هغوی غوښتنو او ستونزو ته پر وخت او جدي رسېدنه کوي او د هغوی د وضعیت د ښه والي لپاره یې دوامداره هڅې ترسره کړي.
محترم مفتي عبدالاحد مسعود د شهیدانو د ورثه وو او معلولینو سره په لیدنه کې د قرآن عظیم الشان د مبارکو آیتونو او د رسول اکرم صلی الله علیه وسلم د سپېڅلو احادیثو په رڼا کې د شهیدانو د لوړ مقام او عظمت په اړه هر اړخیزې او ارزښتناکې خبرې وکړې، مراجعینو ته یې د صبر او استقامت اړوند مهمې توصيې او سپارښتنې وکړي
د یادونې وړ ده چې د شهیدانو او معلولینو چارو محترم وزیر تر دې وړاندې بامیان او دایکندي ولایتونو ته هم سفرونه کړي وو.
