د شهیدانو او معلولینو چارو وزارت د کورنۍ پلټنې ریاست د کارکوونکو لپاره ښوونیز سیمینار پیل شو
د شهیدانو او معلولینو چارو وزارت د کورنۍ پلټنې ریاست د کارکوونکو لپاره د کاري ظرفیت لوړونې په موخه، د مالیې وزارت د تفتیش برخې د استادانو لخوا ښوونیز سیمینار پيل شو، په دې سیمینار کې به د پلټنۍ اړوند مسایل او موضوعات د یوې میاشتې په موده کې د کورنۍ پلټنې ریاست کارکوونکو ته تدریس شي.
د سیمینار په پیل کې د کارکوونکو د چارو رئیس محترم مولوي محمد موسی صدیقي، د کورنۍ پلټنۍ رئیس محترم مولوي محمد انور برادر او د مفتشینو آمر محترم ویس الدین جلیلي هم حضور درلود.
محترم مولوي محمد موسی صدیقي په ادارو کې د تفتیش د دندو او ارزښت په هکله مفصلې خبرې وکړې او زیاته یې کړه چې د دې ډول سیمینارونو جوړول د کارکوونکو د ظرفیتونو او وړتیاوو د لوړولو لپاره خورا مهم دي او دا ډول سیمینارونه کارکوونکي خپلو مسئولیتونو ته متوجې کوي، څو د تفتیش پر مهال شته ستونزې په ښه ډول وپیژني او د تفتیش مهم اصول او شاخصونه په سمه توګه عملي کړي، په دې ترتیب د دې زمینه برابریږي چې یوه سالمه او له هر ډول فساد څخه پاکه اداره رامنځته شي.
همداراز محترم مولوي محمد انور برادر د مالیې وزارت د تفتیش برخې له استادانو څخه مننه وکړه، د کارکوونکو د کاري ظرفیتونو لوړولو په برخه کې د دې سیمینار رول مهم وباله او ټینګار یې وکړ چې د سیمینار د موخو د ترلاسه کولو لپاره به بشپړه همکارۍ وشي، څو کارکوونکي خپل مهارتونه او وړتیاوې د تفتیش په برخه کې نورې هم لوړې کړي.
