د ارزګان ولایت والي د یو شمېر شهیدانو کورنیو سره له نږدې وکتل او د هغوی سره یې نغدي مرسته ترسره کړه
د ارزګان ولایت والي محترم الحاج مولوي عبدالرحمن کندزي د هغو شهیدانو کورنیو سره له نږدې وکتل چې څه موده وړاندې د فرضي کرښې په اوږدو کې د پاکستاني پوځیانو سره د جګړې پر مهال په شهادت رسیدلي وو.
د دې لیدنې پر مهال د لواء قومندان محترم مولوي برهان الدین بیضاوي، د استخباراتو رئیس محترم مولوي نقیب الله ابواللیث، د علماء شورا رئیس محترم مولوي عبدالغفار، د شهیدانو او معلولینو چارو رئیس محترم مولوي عتیق الله منظور او یو شمېر نورو مسؤلینو شتون درلود.
د ارزګان ولایت والي د پاکو شهیدانو روح ته یې دعاء وکړه، کورنیو ته یې د تسلیت او همدري مراتب وړاندې کړل او ژمنه یې وکړه چې د شهیدانو کورنیو ستونزو ته رسیدګي او د هغوی سره مرسته د ولایت د رهبرۍ یو مهم مسؤلیت دی او په دې برخه کې به بشپړه هڅه وشي.
همداراز د شهیدانو او معلولینو چارو وزارت له لوري ځانګړې شوې مرسته د والي صاحب لخوا د شهیدانو ورثه وو ته وسپارل شوه او د اړوندو ادارو مسؤلینو ته سپارښتنه یې وکړه چې د شهیدانو کورنیو ستونزو او غوښتنو ته پر وخت رسیدګي وکړي.
په ورته وخت کې د شهیدانو کورنیو هم د خپلو شهیدانو پر ویاړ خبرې وکړې او ټینګار یې وکړ چې د اسلام او هېواد دفاع د دوی ایماني او ملي وجیبه ده او دا لار به د هر ډول شرایطو او ستونزو سره هم پرې نږدي.
