د شهیدانو او معلولینو چارو وزارت با صلاحیته پلاوي په هرات ولایت کې د یاد وزارت له اړوند ریاست د کړنو او فعالیتونو هر اړخیزه ارزونه وکړه
د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني د یو با صلاحیته پلاوي په مشرۍ په هرات ولایت کې د نوموړي وزارت له اړوند ریاست له فعالیتونو او کړنو هر اړخیزه ارزونه وکړه.
د شهیدانو او معلولینو چارو وزارت باصلاحیته پلاوی چې مشري یې د شهیدانو او معلولینو چارو وزارت مرستیال ښاغلی شیخ صاحب عبدالحکیم حقاني کوي او د یاد وزارت د دفتر رئیس ښاغلی قاري شاه محمد دوست، د داخلي تفتيش رئيس ښاغلی مولوي احسان الله حقاني، د معلولینو چارو رئیس ښاغلی مولوي عبدالنافع منتفع او د پلانونو د تطبیق او ارزونې آمر ښاغلی قاري سید اسحاق سعید یې ملتیا کوي د هرات ولايت دشهيدانو او معلولينو چارو رياست فعالیتونه او کړنې یې په هر اړخيزه توګه وڅيړلې.
د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني د یاد ریاست پر وړاندې پرتې ستونزې او ننګونې واورېدې او د شته ستونزو د حل په برخه کې یې د یاد ریاست مسؤلینو او کارکوونکو ته لازمې لارښوونې وکړې.
د دغه سفر په ترڅ کې د شهیدانو او معلولینو چارو وزارت مرستیال شیخ صاحب عبدالحکیم حقاني د یاد ریاست پر وړاندې د پر تو ستونزو او ننګونو د حل، د نوموړي ریاست لپاره د اداري ودانۍ نشتون او د اړوندو څانګو له لورې معلولینو، یتیمانو ته د لازیاتو مرستو د راجلبولو په موخه د هرات ولایت مرستیال والي ښاغلي الحاج مولوي عبدالقیوم روحاني سره وکتل.
په دې کتنه کې د هرات ولايت مرستيال والي له ياد پلاوي څخه د يتيمانو، معلولينو او کونډو پر وړاندې د پرتو ستونزو او ننګونو له اورېدو وروسته د کرنې، اقتصاد،طبیعي پېښو پر وړاندې د مبارزې، د مهاجرینو او سرې میاشتې ریاستونو رئیسانو او مسؤلینو ته لارښوونه وکړه چې کونډو یتیمانو او معلولینو ته په مرکز او ولسوالېو کې د مرستو د ویش په برخه کې جدي پاملرنه وکړي.
د غونډې په پای کې د هرات ولایت مرستیال والي ښاغلي مولوي عبدالقیوم روحاني ژمنه وکړه چې د یاد ولایت د شهیدانو او معلولینو چارو ریاست پر وړاندې د پرتو ستونزو او ننګونو د حل په برخه کې او همدارنګه یاد ریاست ته د اداري ودانۍ چمتو کولو په برخه کې به لازمې همکاري وکړي.
