د معلولیت درجې د تثبیت روغتيايي کمیسیون له پامير سینما څخه وزرات ته را ولېږدول شو
د معلولیت درجې د تثبیت روغتيايي کمیسیون له پامير سینما څخه وزرات ته را ولېږدول شو
سه شنبه_د چنګاښ اتمه_1400
د شهيدانو او معلولينو چارو سرپرست وزير پوهنمل حمیدالله فاروقي د معلولیت درجې د تثبیت روغتيايي کمیسیون له ډاکټرانو، د شهيدانو ورثې او يو شمېر معلوليت لرونکو وګړو سره وکتل او په اړوندو مسايلو يې ورسره خبرې وکړې.
په پيل کې ښاغلي فاروقي د معلولیت لرونکو وګړو د ستونزو هواري او اسانه لاسرسي په موخه د معلوليت درجې د تثبيت روغتيايي کمېسيون د کابل له پامير سینما څخه د شهيدانو او معلولينو چارو وزارت ته لېږد يوه لاسته راوړنه وګڼله، او هیله یې څرګنده کړه، چې په دې سره به د ياد کمېسیون چارې ګړندۍ شي او د پاتې نږدې (4000) معلوليت لرونکو وګړو د معلولیت درجې د تثبیت بهير به بشپړ شي.
نوموړي زیاته کړه، چې شهیدانو ورثې او معلولينو لپاره د شکايتونو په موخه د نصب شويو صندقونو له لارې يې له ولايتونو او مرکز څخه شکايتونه ترلاسه کړي او اړونده چارواکو ته يې لارښوونه کړې، چې ټول شکایتونه وڅېړي او ژر تر ژره ورته رسيدنه وکړي.
د شهیدانو او معلولینو د چارو سرپرست، روڼتیا، له فساد سره مبارزه او د خدمتونو برېښنايي کول د وزارت کاري لومړيتوبونه وګڼل او ټینګار یې وکړ، چې په دې برخه کې يې د لاسته راوړنو ترڅنګ د لا نورو اقداماتو لپاره هڅی روانې دي.
په پای کې ښاغلي فاروقي د روغتيايي کمېسيون له غړو هيله وکړه، چې د معلوليت درجې د تثبيت چارې چټکې کړي، څو له همدې لارې له پروسې پاتې معلوليت لرونکي وګړي خپل ځنډيدلي حقوق ترلاسه کړي.
نوموړي د ياد کمېسيون غړي په خپلو چارو کې خپلواک وبلل او د کاري مصوونيت او اسانتياوو برابرولو په برخه کې يې ورته د هراړخيزو همکاريو ډاډ ورکړ.
