د شهیدانو او معلولینو چارو وزارت د رهبرۍ غونډه وشوه
د شهیدانو او معلولینو چارو وزارت د رهبرۍ غونډه وشوه
د شهیدانو او معلولینو چارو د سرپرست وزیر پوهنمل حمید الله فاروقي په مشرۍ د وزارت د رهبرۍ غونډه ترسره شوه، چې مرستیالانو، رییسانو، مشاورینو او نورو مسولینو پکې ګډون درلود.
په پیل کې ښاغلي فاروقي چارو ته د پر وخت د رسيدنې تر څنګ وويل: هغو کسانو چې اسناد يې د اسنادو د سمونې او کتنې کميټو څخه خلاص شوي او برېښنايي تذکرې يې اخيستي دي، په مرکز کابل او ولايتونو کې دې د هغوی لپاره ژر تر ژره د حقونو د ورکړې پروسه پيل شي او د کومو کسانو چې د اسنادو پروسه يې لا هم بشپړه نه ده، د ارزونې بهير د ورته چټک کړل شي.
ښاغلي فاروقي د وزارت کارکوونکو ته لارښوونه وکړه، چې د مراجعينو ستونزو ته د رسېدنې لپاره دې په مرکز او ولايتونو کې د خپلو چارو اړوند دفترونو دهليزونو کې د شکايتونو صندقونه نصب او د ارزونې په پار دې ورته مشخصې کميټې رامنځته شي، څو د چا حقوق ضايع نه شي.
د شهيدانو او معلولينو چارو وزارت سرپرست د وزارت له چارواکو وغوښتل، چې د جمهوري رياست او کابينې لارښوونې د جدي تعقيب کړي او د څارنې لپاره دې ورته ځانګړې تګلاره جوړه کړي.
ښاغلي فاروقي زياته کړه، چې د لا زياتو اصلاحاتو د راوستو په موخه دې د ښايسته سالارۍ او تخصص پر بنسټ د قوانينو او مقرراتو سره سم او د اداري او ملکي خدمتونو کميسيون سره په همغږۍ دې د وزارت خالي بستونه ډک کړل شي.
