په ولايتونو کې به د شهیدانو ورثې او معلولینو ته د خدمتونو وړاندې کول د پلازمينې په څیر ګړندي شي
په ولايتونو کې به د شهیدانو ورثې او معلولینو ته د خدمتونو وړاندې کول د پلازمينې په څیر ګړندي شي
د ولایتي آمرينو د همغږۍ او ظرفیت لوړونې په اړه جوړ شوی درې ورځنی ورکشاپ د شهیدانو او معلولینو چارو سرپرست وزیر په وینا پای ته ورسید.
د ورکشاپ په وروستۍ ورځ د شهيدانو او معلولينو چارو سرپرست وزير پوهنمل حمیدالله فاروقي د دریو ورځو په بهير کې د ولایتي آمرينو د هڅو څخه مننه وکړه او ویې ویل، چې دې دا ډول روزنیزو ورکشاپونو په لاره اچولو سره به کاري ظرفیتونه لوړ او د معیاري خدمتونو وړاندې کولو لپاره به تجربې شريکې او وړتیاوې لوړې شي.
ښاغلي فاروقي څرګنده کړه، چې د ولایتي آمرينو ټولې غوښتنې، ستونزې او وړاندیزونه يې یو په یو ليکلي او د مشرتابه او مرکزي چارواکو لخوا تر ډلبندۍ وروسته به هراړخيزه رسيدنه ورته وشي.
ښاغلي فاروقي زياته کړه، له بده مرغه چې په هېواد کې د جګړې له امله د شهیدانو او معلولینو شمیر زياتېږي او دا ددې لامل کېږي چې د هغوی د حقونو د تامين او ورکړې لپاره زيات او ريښتيني کار وکړو.
ښاغلي فاروقي څرګنده کړه، چې د شهیدانو وارثين او معلولین د ټولنې تر ټولو ډېر اړمن او د خواخوږۍ وړ قشر دی، کوم چې دوی د خپل هیواد او ملت د پايښت او هوساینې لپاره بې شمیره قربانۍ ورکړې دي او هیله من يم چې په ولايتونو کې ددې قشر لپاره د اړونده چارواکو لخوا کارونه په چټکۍ ترسره او له ځنډ او خنډ څخه مخنيوی وشي.
ښاغلي فاروقي د ولايتي امرينو د ستاینې ترڅنګ له هغوی سره لازمې لارښوونې او تګلارې شريکې کړې، څو په دې سره په ولايتونو کې د خدمتونو په وړاندې کولو کې چټکتيا او روڼتيا رامنځته شي.
دده په خبره، چې دغه وزارت ته په راتلو سره يې اصلي موخه د چارو ښه سمبالښت او یو بنسټيز او هراړخیز بدلون راوستل دي.
ښاغلي فاروقي وویل، چې په پلازمینې او ولایتونو کې د وزارت ټولې لاسته راوړنې د اړوندو چارواکو د نه ستړې کیدونکو هڅو پایله ده او په ژمنتیا، ټیمي کار او ښه اخلاص سره دغه لاسته راوړنې نورې هم پراخېدلی شي.
د ورکشاپ په پای کې، ولايتي آمرينو ته د چارو په ښه ډول ترسراوي له امله، د شهیدانو او معلولینو چارو وزارت د رهبري هئيت لخوا ستاينليکونه هم ورکړل شول.
