په بغلان ولایت کې د شهیدانو او معلولینو پر (۵۰۰) کورنیو باندې د خوراکي توکو مرستې ووېشل شوې
د بغلان ولايت د شهیدانو او معلولینو چارو رياست د اړمنو کسانو د لاسنیوي او ملاتړ په موخه د يوې خیریه مؤسسې سره په همغږۍ، د شهیدانو او معلولینو پر (۵۰۰) مستحقو کورنيو باندې د خوراکي توکو مرستې ووېشلې، په یادو مرستو کې اوړه، غوړي، وريجې او ځینې نور خوراکي توکي شامل وو.
د مرستو د وېش پر مهال د بغلان ولایت د شهیدانو او معلولینو چارو رئیس محترم ملا احسان الله عابد یتیمانو او معلولینو کورنيو ته ډاډ ورکړ چې د اړمنو کسانو لپاره به نورې مرستې هم برابرې شي، ترڅو هغوی وکولای شي د ژوند لومړنۍ اړتیاوې په اسانه توګه پوره کړي.
په ورته وخت کې، هغو کسانو چې مرستې يې ترلاسه کړې وې، د اسلامي امارت، خیریه بنسټونو او همکارو ادارو څخه مننه وکړه او هیله یې وښوده چې دا لړۍ دوام ومومي او نورې اړمنې کورنۍ دې هم تر پوښښ لاندې ونیول شي.
