ننګرهار کې د خونړۍ پېښې د شهیدانو د ورثې ثبتولو لړۍ پیل شوه
ننګرهار کې د خونړۍ پېښې د شهیدانو د ورثې ثبتولو لړۍ پیل شوه
د شهیدانو او معلولینو په چارو کې د دولت وزیر ښاغلي لعل الدین آریوبي په لارښوونه، د ننګرهار ولایت په ښېوې ولسوالۍ کې د جنازۍ پر مراسمو د وروستي ترسره شوي برید د شهیدانو د وارثینو د ثبتولو لړۍ د یاد ولایت د شهیدانو او معلولینو چارو آمریت له لوري پیل شوه.
د ننګرهار ولایت د شهیدانو او معلولینو چارو آمر محمد طیب معصوم په پیل کې د پېښې د قربانیانو کورنیو ته د وزارت د مشرتابه د تسلیت او غمشریکۍ مراتب وړاندې کړه او ټپیانو ته یې د بېړنۍ روغتیا هیله څرګنده کړه، زیاته یې کړه: د شهیدانو او معلولینو په چارو کې د دولت وزارت د لارښوونې پر بنسټ به د کلنیو حقوقو ورکړې په موخه د یادې پېښې ټول شهیدان، چې قانوني سن یې پوره کړی وي، ثبت او قانوني پروسه به یې ژر بشپړه شي. نوموړي وویل، چې نن یې د ۲۴ شهیدانو کورنۍ ثبت شوې او له مراجعې وروسته به د پاتې شهیدانو وارثین هم په دې پروسه کې شامل شي.
ښاغلي معصوم وویل، چې له روغتونه تر رخصتېدو او د صحي کمېسیون له کتنې وروسته به د پېښې معلولینو ته هم رسیدګي وشي او د کلنیو حقوقو ترلاسه کولو په موخه به کتابچې ورکړل شي.
د یادونې وړ ده، چې د شهیدانو او معلولینو په چارو کې د دولت وزارت، په هېواد کې د وروستیو پېښو ټولو شهیدانو او معلولینو ته په وخت رسیدګي کوي او د حقوقو ورکړې په موخه یې هره ورځ په مرکز او ولایتونو کې د ثبتولو لړۍ روانه ده.
